Bertakoak eta etorkinak otordu bidez batu nahi ditu 'Bizilagunak'-ek
Hilaren 23an elkartuko dira mahai baten bueltan bertako eta bertara etorritako familiak, 14:00etatik aurrera. Adiskidetasun loturak indartu nahi ditu SOS Arrazakeriak iniziatiba horren bitartez.
“Adiskidetasun loturak sortzea” du helburu egitasmoak, SOS Arrazakeriako Gerardo Carrereren arabera. Hilaren 23an elkartuko dira mahai baten bueltan bertako eta bertara etorritako familiak, 14:00etatik aurrera. Bazkariak etxe partikularretan egingo dituztela adierazi du, harremana gehiago estutze aldera, baina aurten, berritasun modura, elkarte batean ere egingo dute otordua.
Dinamizatzaile bat egongo da bi familia elkartuko dituen bazkari bakoitzean. Eurak arduratuko dira logistikaz eta familiekin harremanetan jartzeaz. Carrereren esanetan, “sinbolikoa da gizarteari begira” hemen jaiotakoak eta kanpotarrak mahai berean eseritzea, “etorkinen gaineko eztabaida gizartean dagoen garai honetan”. Gainera, nabarmendu du, esperientzia “aberasgarria” dela.
Orain arte hogei familiak eman dute izena Errenteria-Oreretan, iaz bezain beste. Egitasmoan oraindik parte hartu daitekeela jakinarazi dute. Bisitari edo anfitrioi izan daiteke, eta izena emateko 658 749 756 telefono zenbakira edo sosoarsoaldea@gmail.com helbidera idatzi behar da.
Gipuzkoa Solidarioa, 29an
Donostiako Viktoria Eugenia antzokian Gipuzkoa Solidarioa jaialdiaren bosgarren ekitaldia egingo dute hilaren 29an, 17:00etatik aurrera, etxeko langileen lana aitortzeko asmoz. “Euren lana ez dago aintzatetsia”, esan du Carrerek. “Euren familia utzi dute sorterrietan, eta hona etorri dira beste familia batzuk zaintzera”, gaineratu du.
Bizilagunak egitasmoan parte hartu dutenak, etorkinen elkartetakoak, SOS Arrazakeriakoak eta Eusko Jaurlaritzako, Gipuzkoako Foru Aldundiko eta udaletako ordezkariak gonbidatu dituzte bertara. Etxeko zaintzaileei buruzko bizpahiru esketx, bi elkarrizketa eta omenaldi xume bat izango da ekitaldiaren egitaraua. Ondoren, luntxa egingo dute. Jaialdiarekin, immigrazioaren “alde positiboa” azaleratu nahi dutela adierazi du Carrerek, “eta ez bakarrik albisteetan agertzen diren gauzak”.
SOS Arrazakeriako kideak Julen Mendoza eta Jose Manuel Ferradasekin
