Kantu tradizionala aztertzen ari dira gaur Oiartzunen
Soinuenea Fundazioak XIII. Herri Musikaren Jardunaldiak antolatu ditu; 'Intonazioak eta kantu tradizionala' da aurtengo gai nagusia.
Gaur goizetik musikazale adituek kantu tradizionalari buruzko jardunaldietan parte hartzen ari dira Oiartzunen, Soinueneako kideak gonbidatuta. Agustin Mendizabal, Jean Mixel Bedaxagar, Marie Hirigoyen – Bidart, Jaume Ayats eta Ester G. Llop izan dira aurtengo gonbidatuak. Beren gaiak aurkeztuta, orain mahai inguruan ari dira, Jon Baguesek gidatuta.
Gaurko hitzaldien ondotik, bihar, jardunaldiak kalera egingo dute jauzi. Euskal Herriko soinu tresnak kalez kale ariko dira bihar, 11:00etatik aurrera, eta 12:30ean, Oiartzungo udaletxeko areto nagusian zuzeneko musika emanaldia izango da, Jean Mixel Bedaxagar, Jon Enbeita eta Tornaveus Kataluniako ahots taldearekin.
Jardunaldiei bukaera emateko bazkaria eta kantu festa egingo dituzte.
