Bertso saioa egingo dute hilaren 28an, Zapirain Anaiak eta Ibon Zabala sariak banatzeko
Aitor Mendiluze, Haritz Casabal, Iñigo Mantzisidor Mantxi, Nerea Elustondo, Arkaitz Oiartzabal Xamoa eta Unai Agirre izango dira Niessengo oholtzara igoko direnak. Bestalde, Iñigo Legorburuk Estropada akademikoko komunikazio saria lortu du.
Niessenen izango da bertso saioa, sei bertsolarirekin. Aitor Mendiluze, Haritz Casabal, Iñigo Mantzisidor Mantxi, Nerea Elustondo, Arkaitz Oiartzabal Xamoa eta Unai Agirre izango dira oholtzara igoko direnak. Saioaren antolatzailea, Xenpelar Bertso Eskola, izango aurkezpen eta gai jartze lanetan ariko dena.
XXVI. Zapirain Sariak eta XVI. Ibon Zabala bertso paper lehiaketen garaikurrak banatuko dituzte ekitaldi berean. 18:00etan hasiko da saioa, eta 16 urtetik gora dituztenek hiru euro ordaindu beharko dituzte.
Legorburu, berriro garaile
Iñigo Legorburu errenteriarrak II. Estropada Akademikoaren komunikazio lehiaketa irabazi du, Sonetozko uberetan zehar poesia sortarekin. EHUko Ibaetako errektoreordetzan jaso zuen saria.
Komunikazio lehiaketa honetan edozein testu motak parte hartu zezakeen parte baldintza bakar batekin: Kirolaren baloreak elkarbizitzarako zein garrantzitsuak diren azpimarratu behar zuen testuak. Legorburuk arrauna hartu du hizpide eta soneto formatoko poesia ezberdinen bidez kode etikoa, ahalegina, errespetua edo elkarbizitza izan ditu mintzagai.
Legorburu, Estropada akademikoaren sariarekin
