Intxixu eta sorginek Doneztebe plaza hartuko dute gaur, Ihoteak hasteko. Antolatzaileek pertsonaia bat berreskuratu dute.
Intxixuek, sorginekin batera, piztuko dute jaiaren sua
Atzerakontua bukatzear da. Neguaren hotzari —tira, ez da hainbesterako— aurre egingo dion sua piztuko dute gaur arratsaldean intxixu eta sorginek, Ihoteei hasiera emateko. Gaurtik igandera arte eurak izango dira jaun eta jabe Oiartzunen, eta hori adierazteko, Doneztebe plaza hartuta, udaletxean gora kanaberak jarriko dituzte, udalerriko zortzi auzoen koloreen oihalekin.
Udazken partean hasi ziren Ihoteak antolatzen, berreskuratu zirenetik 27. aldiz. Antolakuntza taldean buru-belarri sartuta dabiltza Aiora Mendiburu eta Gorka Irastortza. Festa erabat errotuta dago Oiartzunen, eta urteko “zitarik garrantzitsuenetakoa” dela uste dute. Aurreko urtetan, plaza txiki geratu da jendetza hartzeko, eta gaur ez da gutxiago izango.
Mendiburuk eta Irastortzak nabarmendu dutenez, intxixu eta mendiko zein baserriko sorginekin “globalizazioa eta teknologia berrien gehiegizko nagusitasuna” kritikatzen dute, eta bizimodu patxadatsu baten aldeko aldarria egiten dute. Intxixu eta sorginak, plazara jaistearekin, herriarekin egotea irudikatu nahi dute aldi berean.
Ihoteetako egitaraua urtez urte finkatzen joan den arren, berritasunei toki egiten diete. Horrela, gaurko lehen ekitaldia iaz egin zuten estreinakoz: Burrunba. 16:45ean elkartuko dira musikariak Beheko Plazan, eta herriko plaza nagusiraino joango dira instrumentuekin. Bertan, txokolate jatea egingo dute, giroa berotzen jarraitzeko.
Zomorrozinkoren itzulera
19:00etan, gaur, Azeri eta Sorgin dantzak egingo dituzte, eta ordu erdi beranduago jaitsiko dira plazara, Urkabetik, zortzina intxixu eta mendiko sorgin. Zortzi, udalerriko auzoak bezain beste, auzoen izaerari gorazarre egiten baitiote Ihoteetan. Jaiaren sua piztu, eta udaletxea hartuko dute. Hasierako zeremonia bukatuta, poteoan hasiko dira herritarrak, zakuak soinean jantzita.
Gauak ezingo du gehiegi luzatu, ala bai. Izan ere, biharamunerako indarrak gorde beharko dituzte, 09:00etan, kuestazioa hasiko baita. Bakoitzaren auzoko etxe eta baserrietan puskak bilduko dituzte, neskak poxpolinez eta mutilak zuriz jantzita, espartinetako soka eta txapela gorriak kenduta. Genero rolak hankaz gora jar daitezke, noski.
Zakua beteta, 14:30ean —puntualak izanez gero— bazkalduko dute, auzoko elkarteetan. Gosea eta egarria berdinduta, auzo guztietako oiartzuarrak Doneztebe plazan geratuko dira, tabernaz taberna, norbaitek egarri gehiago balu, poteatzeko. Ote-gizona izango da bertan, ohi bezala, baita ere aurten berreskuratu duten pertsonaia ere: Zomorrozinkoa.
Sua bueltan
Garai batean, Mendiburu eta Irastortzak gogorarazi dutenez, Ihoteak ostiralean hasi eta larunbatean bukatzen ziren. Orain, igandera pasatu dituzte larunbata arratsaldean egiten zituzten ekitaldiak.
Igandeko eguna hasteko, txistulariek diana egingo dute 09:00etatik aurrera. 11:00etan, berriz,
karroxak irtengo dira Beheko Plazatik, kalejira alaia egiteko asmoz. Eguerditik ordu erdi pasatzean, mutxikoak dantzatuko dituzte Doneztebe plazan.
Bezperan bezala, bakoitzak bere auzoan bazkalduko du. 17:00etan, berriz, plazan haurrentzako jolasak egingo dituzte, itxiera ekitaldiaren aurretik.
19:00etan intxixu eta sorginek eurekin eramango dute euren altxorrik preziatuena: sua. Kontsolatze aldera, suzko akerrak festetako azken txinpartak botako ditu.
Intxixu eta sorgin gogoz geratzen denak, baina, badu urte osoan eurekin gogoratzeko modurik: ohiko txokoetan salgai jarri dituzte egutegiak. Bitartean, iazko Ihoteetan hasierako egutegiaren azken orrialdea pasatu da. Onena etortzeke dago.
