Transportes Alcaine aurreratu da markagailuan, baina oiartzuarrek hamar minutura berdindu dute. Azkeneko partida igandean jokatuko dute.
Anne Perezek buruz sartu zuen gola ospatzen [Argazkiak: Sandra Ayala Cano].
Aragoira bidaia egin zuen Oiartzun Kirol Elkarteko emakumeen taldeak —baita hainbat zalek ere—, Transportes Alcaineren zelaian jokatzeko. Bero sapak ongietorria eman zien Oiartzundik joan zirenei.
Sailkapenaren bigarren erdian sailkatuta dago Zaragozako taldea. Garaipena bilatzeko zelai egokia, beraz. Ohi bezala, oiartzuarrek amarauna osatu zuten defentsan, eta etxekoak saiatu ziren partidaren gidaritza hartzen. Aukerei dagokienez, ez zen lehenengo zati oso emankorra izan. Etxekoek bi aukera izan zituzten, eta penaltia eskatu zuten. Oiartzungo jokalariek, aldiz, areaz kanpotik hiru jaurtiketa egin zituzten.
Aldageletatik bueltan, Zaragozakoek abiadura ezarri zioten partidari, eta aukerak sortzen hasi ziren. Ordu laurdenera aurreratu ziren markagailuan, areaz kanpotik egindako jaurtiketa bati esker. Aldea handitzea bilatu zuten, baina aukera bikoitza ongi zapuztu zuen oiartzuarren defentsak. 74. minutuan berdindu zuten oiartzuarrek, Anne Perezen burukada bati esker. Ordu laurden aurretik zutela, aragoiarrek Ainiren atea setiatu zuten. Hala ere, azken aukera izan zuten oiartzuarrek, baina ez zuten asmatu. Horrela, puntua urratu zuten Jon Alkortaren jokalariek.
Datorren igandean jokatuko dute ligako azkeneko jardunaldia. Rayo Vallecano jasoko dute Karla Lekuonan, 12:00etan. Garaipena eskaini nahi diete denboraldi osoan zehar hain fidelak izan diren jarraitzaileei.