Angelu eta Gasteizko hilketak salatuko dituzte Txoko Feministan
Udalak indarkeria matxista saihesteko formazio ikastaroa eman die Txosna Batzordeko kideei.
Herenegun, egun bakar batean, lau emakume izan ziren indarkeria matxistaren biktima Euskal Herrian. Angelun (Lapurdi) emakume bat eta bere bi alaba, 11 eta 17 urteko bi neska, tiroka hil zituzten. Gizona, andrearen senarra eta bi nesken aita, hilda agertu zen etxean. Gasteizen, berriz, emakume bat hil zuela aitortu du gizon batek eta Zadorra ibaira bota zuela gorpua. Ibai horretan aurkitu zituen gorpuzkiak herenegun Ertzaintzak. Atxilotu egin zuten hilketa aitortu duen gizona.
Lau hilketa horiek salatzeko, Antiju Morik talde feministak elkarretaratzea egingo du gaur arratsaldean, Txoko Feministan. 19:00etan hasiko da. Udalak bat egin du salaketa ekitaldiarekin.
Hiru urruntze agindu berri
Indarkeria matxista saihesteko Krisi Mahaia bigarren aldiz bildu da. Ohiko bilera izan da, xanistebanak lantzeko. Udaleko hiru sailetako —Alkatetza, Gizarte-Ongizatea eta Feminismokoak— herriko eragile feministekin bildu ziren. Anbulatorioko arduradunak ere bertan izan ziren, informazioa trukatzeko eta koordinazioa errazteko.
Krisi Mahaiak herrian izan diren indarkeria matxista kasuen berri emateko baliatzen dute, besteak beste. Urtarriletik ekainera bitartean hiru urruntze agindu gehiago daude Oiartzunen, eta guztira 30 dira urruntze agindua bete behar duten gizon erasotzaileak.
Datorren ohiko bilera azaroaren 25ean izango da.
Formazio ikastaroa txosnentzat
Udalak jakinarazi duenez, indarkeria matxista saihesteko duen “arduraren barruan”, formazio ikastaroa eskaini diete herriko ostalariei eta Txosna Batzordeari. Feminismo Sailak antolatu zuen atzoko bilera, eta udalak onartu duenez, “nahi baino jende gutxiagok” hartu zuen parte.
Abiapuntu teorikotik hisi ziren: genero sistemak ulertu, indarkeria motak ezberdindu eta indarkeriaren zergatiak ulertzea. Indarkeria matxistaren kasu errealak identifikatu eta detektatzeko gakoak eman zituzten. Horrez gain, honakoak izan ziren jorratu zituzten beste gaiak: indarkeria matxistaren inguruan dauden mitoak desmuntatu, egon daitezken esperientziak partekatu, Oiartzunen dauden tresnak ezagutu, indarkeria identifikatu eta hauen aurreko jarrera egokiak identifikatzea izan zen bi orduko saioan Farapiko bi teknikariren egitekoa.
Krisi Mahaian eragile feministak, udala eta osasun zentroko kideak bildu dira.
