Sendia programaren barruko sei saioko ikastaroa da. Mendekotasuna dutenen zaintza planifikatzen lagunduko dute, besteak beste.
Mendekotasuna dutenak hobeto zaintzeko ikastaroak emango dituzte.
Oiartzungo Udalaren Gizarte-Ongizate sailak, aldundiaren laguntzarekin, Sendia izeneko programa jarri du martxan. Mendekotasuna duten pertsonak zaintzen dituztenei dago zuzenduta, eta hiru helburu izango ditu. Alde batetik, zaintza horiek planifikatzeko ezagutza ematea. Bestetik, mendekotasuna duten pertsonen autonomiari garrantzia ematea. Azkenik, zaintza lan horiek eta bizitza pertsonala bateragarri egiteko gaitasunak garatzea izango litzateke azkeneko oinarria.
Hamabi orduko ikastaroa izango da, bina orduko sei saiotan banatuta. saio bakoitzean oinarrizko kontzeptuak landuko dituzte, taldean: zaintzaren antolaketa; norbere burua zaintzeko teknikak; lehenengo sorospen, mobilizazio eta transferentziak; zaintza lanen banaketan dauden genero paperak eta estereotipoak… Matia Fundazioko adituak izango dira saioak gidatzeko ardura izango dutenak.
Ikastaroak hiru aste iraungo ditu, eta lehenengo saioa hilaren 18an izango da. Saio guztiak —azaroaren 2an bukatuko da— udaletxeko areto nagusian izango dira, 15:00etatik 17:00etara. Ikastaroa dohainik izango da, eta aurretik izena eman beharko da, 943 49 05 52 telefono zenbakira goizetan deituz.