Merkatari eta ostalariak euskara eskolak jasotzen hasi dira

Zortzi merkatari hasi dira oinarrizko euskara klaseak jasotzen, bi taldetan banatuta. Euskararen presentzia normalizatzea da helburua.

Erik Gartzia

Oiartzun

2017/01/25

Mamuten ematen dituzte ikastaroak.

Oiartzungo merkatari eta ostalarientzako euskara ikastaroa hilabete honetan hasi da, Ttur-ttur Euskaltzaleon Bilguneak eta udalak antolatuta. Zortzi merkatarik eman dute izena, eta, bi taldetan banatuta, 60 orduko euskara ikastaroa jasoko dute ekainera bitartean. Ikasle batzuek berriro eman dute izena; beste batzuk, berriak dira. Oinarrizko ikastaroa jasotzen ari dira, bezeroekin oinarrizko elkarrizketak izateko. Mamuteko honako establezimenduetatik langile bana hasi da ikastaroetara joaten: Beti-Auro kafetegia, Metro Cuadrado, Stock Factory eta Zoocentro (1). Horiez gain Talaia poligonoko Mas por menos, Arraguako Alhambra taberna, eta Elizaldeko Txara kafetegia eta Itsaso gozoki denda. Talde bat goizez aritzen da, eta bestea arratsaldez, Intxixu-AEKko irakasleek gidatutako eskoletan. Ikastaroak ehun euroko kostua du, baina baldintza batzuk betez gero, %70eko deskontua jaso dezakete ikasleek. Udalak finantzatuko luke hobari hori. Helburua euskara normalizatzen joatea da. Klaseak hasi diren arr en, oraindik izena eman daitekeela gogorarazi dute ikastaroaren antolatzaileek. Horretarako, Ttur-ttur Euskaltzaleon Bilgunearekin jarri beharko da harremanetan, e-posta edo telefono bidez (943 26 01 82). Elkarteak Fermiñenen duen bulegotik ere pasa daiteke.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.