Ihoteak 30. aldiz ospatuko dituzte, berreskuratu zituztenetik
Ostiralean iritsiko dira intxixu eta sorginak herriko plazara. Ihote Taldeak asteburuko ekitaldien egitaraua prest dauka.
Ostiral arratsean helduko dira intxixuak, beste pertsonaiekin batera. Gainean dira ihoteak. Datorren ostiral arratsean, intxixu, sorgin eta beste pertsonaiak Done Eztebe plazaren jabe egingo dira, eta igandera arte festa giroa nagusituko da Oiartzunen. Ihote Taldeak prest du egitaraua. 1989an hasi ziren ihoteak berreskuratzen, eta hurrengo urtean hasi ziren intxixuak plaza hartzen.
Aurten, gainera, berritasun batekin dator festa. Zehazki, Edurne Arregik intxixu, sorgin, basandere eta beste pertsonaiei buruzko istorioak idatzi ditu. Urrats liburudendan sei euroren truke eros daitezke.
Bestalde, aurtengo festan dena ongi atera dadin, Ihote Taldeak jakinarazi du segurtasun neurriak bete arte ez direla ostiral eta igandeko ekitaldiak hasiko. Beraz, antolatzaileen argibideak modu egokian jarraitzeko eskatu dute, denen gozagarri izan daitezen.
Hilak 22, ostirala
- 16:45ean: Burrunba, Beheko Plazatik. Haurtzaro Ikastolak antolatuta.
- 17:30ean: Txokolate jatea Done Eztebe plazan. Haurtzaro Ikastolak antolatuta.
- 19:00etan: Azeri dantza eta Sorgin dantza.
- 19:30ean: Intxixu eta Sorginek plaza hartuko dute. Segidan, poteoa, janzteko zakua etxean ahaztu gabe.
Hilak 23, larunbata
- 09:00etan: Kuestazioa, herriko zortzi auzoetan, poxpolinez jantzita.
- 14:30en bueltan: Bazkariak, auzoetako elkarteetan.
- 18:00etan: Auzoetan ibili diren kuadrillak plazan elkartuko dira.
- Ondoren, musika eta festa giroa Kataxulo kobaren txosna inguruan.
Hilak 24, igandea
- 09:00etan: Diana, txistulariekin.
- 11:00etan: Karroxa eta kalejira, Beheko Plazatik, Elizalde Herri Eskolak antolatuta.
- 19:00etan: Intxixu eta sorginei agurra, eta, ondoren, suzko akerra.
