[Galeria] Oarsoaldeko mugimendu feministak indar erakustaldia egin du
Eskualde udalerri guztietako feministek bat egin dute Errenteria-Oreretan. Eduki politikoz bete dute gaurko greba, eta martxoaren 8a egunero izatea ahaleginduko dira.
Milaka lagunek bete dute, berriro, Errenteria-Oreretakozumardia. Oarsoaldeko Mugimendu Feministak giharra baduela erakutsi gaur arratsaldean. Udalerri guztietako feministek bat egin dute manifestazioa —berriro— erraldoian. Herriko Plazatik atera da, eta Santa Klara kalearen bukaeran Oiartzungo errefortzuak batu dira jada gizena zen mobilizaziora. Nafarroako etorbidean barrena, Iztieta-Ondartxoko anbulatorioan lezoarrak zain zeunden. Auzo horretatik aterata, berriz, Alabergako biribilgunean prest zeuden antxotarrak, mobilizazioa are jendetsuagoa egiteko.
Eguerdikoaren ibilbide ezberdina egin du, eta Musika Plazatik pasatu dira, Morrongilleta, Maria Lezo eta Biteri Txiki gurutzatu ondoren, Gamon Zumardira iristeko, erabateko festa giroan. Bertan ordu laurden inguru itxaron behar izan dute, guztiak etor zitezen. Musikarekin girotu dute itxaronaldia; Erre zenituzten hit-a izan da gorputzak gehien astinarazi dituena.
Ondoren, irakurketaren txanda etorri da. Salatu dute aldarrikapena merkantzia bihurtu nahian dabiltzala, baina ez dutela lortuko, mugimendu feministak eduki politikoz beteko duelako. Horrela, emakume baserritarrek, zaintzaileek, garbitzaileek, migranteek, aniztasun funtzionala dutenek… hartu dute hitza, bakoitzak bere arlotako borrokaren nondik norakoen aldarrikapenak azaltzeko.
Bukatzeko, Ereintza Dantza Taldeko neskak igo dira zumardiko kioskora. Egun hauetan whatsappez whatsapp ibili den Konplize ditut eta abestia dantzatu dute. Ekitaldia bukatzean, batzuek liho fabrika zaharra zegoen plazako karpara jo dute, hor jarraituko baitu festa/aldarrikapenak ordu txikietara arte.
Normalean Marmotaren Eguna esamoldea modu ezkorrean erabiltzen da. Mugimendu feministak, berriz, horri buelta eman eta esanahi baikorra eman nahi dio: egunero Martxoaren 8a izatea nahi dute.
