Ikastoletako literatura hauteskundeetan lau oiartzuar izendatu dituzte
Antton Kazabonen liburu bat eta Pello Añorgaren beste bi, ikasleek hautatutakoen artean. Iosu Mitxelena eta Jokin Mitxelena, ilustratzaile onenak.
Euskal Herriko ikastoletan egin dute bozketa. Ikastoletako ikasleek JUUL literatura-hauteskundeak egin zituzten atzo, liburu eta ilustratzaile onenak hautatzeko. Atzo Haur eta Gazte Literaturaren Nazioarteko Eguna zen, eta egun hori probestu zuten hautetsontziak betetzeko. Hautatuen artean lau oiartzuar agertzen dira: Jokin Mitxelena eta Iosu Mitxelena ilustratzaileak eta Antton Kazabon eta Pello Añorga idazleak. Añorgak, gainera, bere bi titulu ikusi ditu hautatuen artean.
Añorgaren Tontolapiko B kategoriako (LH 1 eta 2) hirugarren gelditu da. D kategorian (LH 5 eta 6) bigarren postua lortu du Martzelo Itsua liburuarekin. Kazabonen Bisera gorria, berriz, izan da boto gehien lortu dituen hirugarrena, E kategorian (DBH). Ilustratzaileek zirkunskripzio bakarra zuten.
Euskal Herri osoko ikastoletan egin dute bozketa, eta 16.600 ikaslek egikaritu dute bere sufragio eskubidea. Aukeraketa egiteaz gain, hauteskunde-mahaian lehendakari, mahaikide eta idazkari lanetan ikasleak eurak aritu ziren. Hauteskunde-prozesu bat zer den ikasteko aukera izan zuten modu horretan. Ikasleek botoa emateko bi era izan zituzten: batetik, boto-txartelaren bidez, eta, bestetik, boto-elektronikoaren bidez.
Juul hauteskundeak: emaitzak.
