10301 Elkartasun Keinuren kanpaina azken txanpan sartuko da
Gaur truk txapelketa, bihar Endika Loiolaren diskoaren aurkezpena eta larunbatean lasterketa eta bazkaria egingo dituzte.
Apirila hasieran egin zuten merkatu txikia. Errefuxiatuekiko elkartasunez eta herrian sentsibilizazioa bultzatzeko asmoz sortu zen 10301 Elkartasun Keinu iniziatiba. Hilabete inguru daramate kanpainan, eta aste honetan sartuko dira azkeneko txanpan.
Gaur arratsean truk txapelketa egingo dute Kataxulo Gaztetxian, 22:00etan hasita. Bihar, toki berean, Endika Loiolak bere bakarkako lehenengo diskoa aurkeztuko du, 18:30ean hasita. Azken hamabi urteetan idatzi dituen kantak bildu ditu disko horretan.
Egun handiena datorren larunbatean, hilak 4, izango da. 11:00etan lasterketa pare bat egingo dituzte, bat haurrentzako eta bestea helduentzako. Txikienek plazari emango diote buelta, eta adinean gorago daudenek, berriz, 1.400 metroko ibilbidea izango dute aurretik. Helburua ez da lehiatzea izango, baizik eta babesa adieraztea. Dortsalak hiru euroko prezioa izango duela jakinarazi dute.
Eguerdian bazkaria egingo dute Elorsoron, eta ondoren musikak girotuko du kiroldegia. Arratsean festak Kataxulon jarraituko du.
Ekarpen ekonomikoa egin nahi dutenek badute aukera. Kontu korronte zenbakia honakoa da: ES 92 3035 0235 22 2350038982. Kontzeptuan Oiartzun jartzea eskatu dute, modu horretan oiartzuarrek zenbateko ekarpena egin duten jakingo baitute, errefuxiatuei laguntzeko.
