Koldokide "ahaldunduta eta indartuta" atera da igandeko festatik
Euskal Eskola Publikoaren Jaiaren balorazio oso positiboa egin du guraso elkarteak. Hasieratik zehaztutako helburuak bete direla diote kideek.
Nexgraffek jairako espresuki egindako mural ikusgarria. Heldu da joan den igandeko Euskal Eskola Publikoaren Jaiaren balorazioa egiteko unea. Antolatzaile lanetan aritu diren Koldokide Guraso Elkarteko kideek argi dute: “Gure balorazioa oso positiboa da”. Igandeko eguna “bikaina” izan zen guraso elkarteko kideentzat, denbora luzez egindako lanaren emaitza “biribila” izan zela diote.
Errenteria-Orereta izatez “herri abegitsua” da gurasoen ahotan, eta nabarmendu dute igandean ere besoak zabalik hartu zituztela Euskal Herri osotik iritsitakoak. Helburuetako bat publiko ezberdina erakartzea zen, eta hala izan zela ondorioztatu dute antolatzaileek. “Goizean haur aulkiak eta familiak ziren nagusi, eta arratsaldean, berriz, gazte jendea ere hurbildu zen jaira. Jendeari giro lasaian kalitatezko eskaintzaz gozatzeko aukera eman nahi izan genion, eta lortu genuen”.
Egun osoan zehar boluntario lanetan aritu zirenen jarrera ezin hobea izan zen antolatzaileentzat, “lankidetza eta inplikazio adibide garbia” izan zela igandekoa. Gainera, hezkuntzaren eztabaidari heltzea “ezinbestekoa” dela argi geratu dela diote, jaiak izandako oihartzuna dela eta.
Amaitzeko, egungo hezkuntza sistema aldatzeko beharra nabarmendu dute, eta hori soilik guztien arteko adostasun batetik lortuko dutela. “Uste dugu apustu irmoa egin behar dela hezkuntza hori kalitatezkoa, doakoa, parekidea eta euskalduna izan dadin, edozein umeren aukera berdintasuna bermatze aldera. Ahaldunduta eta indartuta atera gara prozesu honetatik, lanerako gogoz eta etorkizuneko erronkei aurre egiteko prest”, gehitu dute gurasoek.
