Azken unean argituko da nor izango den Pasaiako alkate
Larunbatean osatuko da Pasaiako udalbatza eta zalantzak dira nagusi. EH Bilduko Junkal Mintegiak bere burua aurkeztuko duela baieztatu du. Oraingoz, PSEk eta EAJk ez dute akordiorik lotu, baina negoziatzen ari dira.
Larunbatean egingo dute legealdi berriko lehen udalbatzarra, Arizabalo jauregian. Larunbat goizean Pasaiako alkate berria hautatzeko udalbatzatzarra egingo dute, baina oraindik ezin da ziurtatu nork hartuko duen agintea. Donibaneko udaletxean da, 10:00etan.
Junkal Mintegia EH Bilduko alkategaiak bere burua alkate izateko aurkeztuko duela baieztatu dio HITZAri. Politika egiteko eredu berri baten alde egingo duela adierazi du Mintegiak, “lankidetza eta akordiorako prest egongo gara”. Dena dela, hauteskundeen irabazlea izan arren, PSE-EE eta EAJren arteko azken uneko akordio batek, alkate postua kenduko lioke Mintegiari.
Oraingoz, ordea, ez dirudi halako mugimenduak emango direnik. PSEko iturriek jakinarazi dutenez, egungo egoera aste hasierako berbera da. Gipuzkoako Alderdi Sozialistaren Gipuzkoako idazkari nagusi Eneko Anduezak, Gomez alkategaia aurkezteko aukera deuseztatu egin zuen, EAJk udal gobernuarekin bat egin ezean. Egonkortasuna eskatzen diete sozialistek jeltzaleei.
Pasaiako EAJrekin harremanetan jarri da HITZA aldi berean. Nahikari Otermin zerrendaburuak gaur arratsaldean HITZAri baieztatu dio negoziazioetan ari direla alderdi sozialistarekin, baina harreman horien emaitzen gainean ez du azalpenik emateko aukerarik izan: «Akordioatara iritsi gaitezke, edo ez. Ikusiko dugu». Nahikari Otermin EAJko alkategaiak, baina, oposizio eraikitzailea egiteko asmoa baietsi zuen hauteskundeen biharamunean. Hau da, PSErekin berriz ere agintzeko aukera baztertu zuela ulertarazi zuen Oterminek. Hala ere, ikusi beharko da gaurtik larunbatera zer gertatzen den. Izan ere, goi mailan negoziazioak egin dituzte EAJk eta PSE-EEk, eta ikusi beharko da herri mailan horien erabakiek zer eragin duten.
