Abittu egitasmoaren balorazio positiboa egin dute
Jarduera fisiko iraunkorra sustatzea helburu duen egitasmoak 46 erabiltzaile izan ditu. Aurten osasun zentroan ere martxan jarri dute Abittu.
Abittu egitasmoak ikasturte honi agur esan dio, eta bukaeretan gertatu ohi den bezala, balantzea egiteko ordua da. Jarduera fisikoa sustatzea helburu duen egitasmoa sustazen duten erakundeak elkartu dira, balorazioa egiteko. Udaleko ordezkariak, Eusko Jaurlaritzaren Mugiment egitasmokoak, aldundikoak, Osakidetzako profesionalak eta Abittuko orientatzailea elkartu dira.
Balorazioa positiboa izan da. Zerbitzuaren helburu nagusia jarduera fisikoa sustatzea da, baina jarduera hori iraunkorra izatean jartzen dute indarra. 46 erabiltzaile izan ditu ikasturte honetan.
Osasun zentroan, estreinakoz
Abittu iazko martxoan jarri zuten martxan. Aurtengo ikasturtean, Elorsoroko zerbitzua mantentzeaz gain, osasun zentroan ere martxan jarri da Abittu. Astean behin, Mikel Lopez orientatzailea bertan izan da aholkuak ematen, medikuek jarduera preskribitzen zieten orori. Otsailetik aurrera, 35 paziente bideratu dituzte bertatik.
Beste zazpi bere kabuz joan dira, eta gainontzeko laurak udalaren Gizarte-Ongizate Sailak bideratu ditu.
Gehienak, emakumeak
Erabiltzaileen %59 inguru emakumeak izan dira, eta gehien-gehienek (%84,7) 40 urtetik gora dituzte. Erabiltzaile gehienek jarduera autonomoak nahi izan dituzte, etxean edo kiroldegian egiteko modukoak.
“Ohiturak eta errutinak ez dira egun batetik bestera aldatzen eta gure laguntza ezinbestekoa da”, dio Lopezek. Saio bereziak antolatu dituzte, esaterako, Kirol Astearen barruko Txarako zirkuitu bio-osasungarria nola erabili ikasteko tailer praktikoak. Erorketak saihesteko bi tailer praktiko ere egin dituzte.
Irailean, buelta
Udako oporraldiaren ondoren, irailean bueltatuko da egitasmoa, Elorsoron eta anbulatorioan. Gainera, bide berria urratu nahi dute, etxez etxeko zerbitzua jasotzen dutenekin. Bazterketa arriskuan dauden bizilagunak laguntzen dituen Ereiten programarekin ere elkarlanean aritu nahi dute.
