Salto! udalekuetakoak Oiartzunen daude
Gaur goizean Usurbildik irten dira UEMAk antolatzen duen udalekuetako gaztetxoak, Oiartzunera bidean. Haurtzaro Ikastolan pasatuko dute gaua.
Done Eztebe plazara iritsi dira. Gaur goizean abiatu dira UEMAk antolatzen dituen Salto! udalekuetako gaztetxoak. Usurbildik irten dira gaur goizean, eta Oiartzunera iritsi dira 16:30 inguruan. Bidean ez da inor urtu.
Done Eztebe plazara iritsita, Oiartzoko, Elizaldeko eta Haurtzaroko ikasleek harrera egin diete. Motxilak lo egingo duten tokian —ikastolan— utzi dituzte, eta segidan igerilekura joan dira, merezitako bainua hartzera.
Arrats partean, kontzejupean afalduko dute. Gaztetxoen udalekuetako oinarrizko ezaugarrietako bat gitarrak dira, eta Oiartzunen ez da gutxiago izango: Malen eta Ekainek kantaldia eskainiko diete gaztetxoei.
Ikastolan lo (edo) egin ondoren, Berara abiatuko dira bihar goizean. Udaleku ibiltaria igandean bukatuko da, Arantzan. Udalerri euskaldunetako gaztetxoen arteko harremanak sustatzea da helburua.
