Lesakako sanferminetara, Oihartzun Guk-en autobusean
Hernaniko sanjoanetara bezala, Oiartzungo gazteek autobusa antolatu dute datorren ostiralean joateko. Oraingoan, arratsaldean aterako dira Lesaka aldera.
Onin errekan bukatu behar badu norbaitek, hobe du zutik bukatzea [argazkia: erran.eus].. Hernaniko sanjoanetara joateko egin zuten bezala, Oihartzun Guk-ek autobusa antolatu du Lesakara joateko. Sanferminetara datorren ostiralean —hilak 5— joango dira (egitaraua norbaitek ikusi nahi balu, hemen egin klik).
Oraingoan, rodajea egina dutelako edo, lehenago irtengo dira: 17:30ean aterako dira Haurtzaro Ikastolako aparkalekutik. Hori bai, tiketa lehenago hartu beharko dute, Kastro, Sorgin edo Makubi tabernetan. 15 euroko prezioa izango du bidaiak.
Itzulera hurrengo egunean izango da, eta ez goiz: 12:00etan bueltatuko da autobusa. Norbait autobusera garaiz iritsiko ez balitz, kanpin denda batean bilatu beharko du tokia…
