Alazne Garridok eta Julen Perez atletek domina bana ekarri dute Espainiako Txapelketatik
Granollersen jokatu dute, asteburuan, 20 urtez azpiko Espainiako Atletismo Txapelketa. Errelebotan lortu dituzte metalak, eta bakarkakotan finalera iritsi dira.
Garrido eta Perez, dominekin. Larunbat eta igandean jokatu dute, Granollersen (Herrialde Katalanak), 20 urtez azpiko Espainiako Atletismo Txapelketa. Han izan dira bi oiartzuar, eta ez dira hutsik bueltatu. Julen Perez Loperenak eta Alazne Garrido Zapirainek domina bana ekarri zituzten, biek erreleboetan (4×100).
Gizonetan, Perezek zilarrezko domina eskuratu zuen Donostiako Atletikorekin. Laukotea osatu zuten Unai Mitxelena, Ander Uranga eta Erkki Zeberiorekin. Emakumeetan, Super Amara BATekoak hirugarren izan ziren. Garridok Ana Sorondo, Nerea Sasiain eta Junkal Etxegarairekin batera lortu zuen brontzezkoa.
Lorpen horiez gain, oiartzuarrek bakarkako finaletara iristea lortu zuten, bakoitza bere proban. Nesken 400 metro hesi lasterketan, Garrido seigarren izan zen. Mutiletan, berriz, Perezek zortzigarren bukatu zuen 200 metroko probako finala.
