Oroimenaren Astea izango da uztaileko azkenaurrekoa
Ezkaba gotorlekuko erakusketa bat eta 1936ko Gerra genero ikuspegi batetik aztertuko duen hitzaldia antolatu ditu Kattin Txikik.
Kattin Txikik Oroimenaren Astea antolatu du uztaileko azken aurreko asterako, herriko hainbat eragilerekin batera. Hilaren 20tik 28ra —larunbatak— erakusketa jarriko dute udaletxeko pleno aretoan. Lur azpitik lur azalera (San Kristobalgo gotorlekua) izena duen erakusketa ikusi ahal izango da, Txinparta taldeak prestatutakoa.
Talde horrek Nafarroako Ezkaba mendian zegoen gotorlekuaren gertatutakoak ikertzeko eta ezagutarazteko helburuarekin lan egiten du.
Hilaren 22an, astelehenarekin, Aranzadi Zientzia Elkarteko Lourdes Herrastik hitzaldia emango du, Oiartzun Azmarrin-ek antolatuta. 1936ko altxamendu militarra genero ikuspegi batetik jorratuko du antropologoak. Horrez gain, Aiako Harria Gaztelumendik Oroimenaren harra unitate didaktikoa aurkeztuko du ekitaldi horretan bertan. 19:00etan hasiko da, eta udaletxeko pleno aretoan izango da.