Oiartzun Irratiak dena prest du oiartzuarrekin urteurren festa ospatzeko
Goiz-goizetik gauera bitarteko egitaraua prestatu dute, herriko elkarteekin elkarlanean. Eguraldia ere lagun izango dute.
Alazne Etxeberria eta Irati Odriozola esatariek herriko elkarteen laguntza jaso dute festa antolatzeko. Oiartzun Irratiak hogei darama uhinetan bidaiatzen, eta urtemuga hori nolanahikoa ez denez, bihar festa handia ospatuko dute.
10:00etan hasiko dira ospakizunak. Zuzeneko emanaldia egingo dute plazatik bertatik, Oidultzeko dultzaineroek Elizalde auzoko nagienak esnatzen dituzten bitartean. 11:00etan, Haurtzaro Ikastolako komunitateko kideen laguntzarekin, haurrentzako txokoa irekiko dute.
Desafio handia
12:00etan, Done Eztebe hainbat oiartzuarren arteko desafioa egingo dute: esperientzia sasoiaren kontra; kemena jakinduriaren kontra. Argituz: herriko beteranoak gazteen kontra ariko dira, herri kiroletan.
Honakoek osatuko dute gazte(ago)en taldea: Eneritz Arbelaitz, Jon Bengoetxea, Iker Sein, Aitor Jauregi, Maddi Soroa, Enara Elizegi, “Larra” eta Markelek. Beteranoen zortzikotea hau izango da: Joxe Mari “Txatola”, Kaxinto “Barein”, “Ttakalo”, Amalur Arbelaitz, Izarraitz, Karmele Irastorza, Andoitz Pikabea eta Iosune Cousillas.
Bazkariko sarrerak, agortuta
Desafioaren ondoren, irratiaren lehenengo bi hamarkadak ospatzeko ekitaldi txiki bat egingo dute. 14:00etarako jarri dute bazkariaren ordua. Salgai jarri zituzten 150 sarrerak saldu dituzte, eta giro ona ziurtatuta egongo da. Eguraldia ere lagun izango dute, baina, badaezpada, kontzejupean egingo dute otordua, itzalpean edo ateri, kasuan kasu. Herriko hainbat eragile, norbanako eta enpresaren laguntza jaso dute.
Ongi bazkaldu ondoren, Iraitz Mateo, Jon Diaz de Mendibil, Jon Martin eta Josu Ibarguren bertsotan ariko dira. Mikrofonoak ez dituzte saioa bukatu eta segituan kenduko. Izan ere, Irati Ordiozolak, Ane Badiolak eta Joxe Leon Kazabonek kantaldia eskainiko dute. Bazkalostearekin bukatzeko, bingoa egingo dute, bertaratutakoen artean saltsa pixka bat jartze aldera.
Koro eta dantzak
17:30ean, Tio Teronen Semeek beren ikuskizuna eskainiko dute plazan. Arratsean, 22:00etan, Lartaun abesbatzak bat egingo du, udako urteroko kontzertua emanez. Hipatiaren Lorategian izango da koro saioa.
