Karaezko udaleko ordezkariak xanistebanetara gonbidatu dituzte
Oiartzun-Karaez Elkartasun Komiteko kide batzuk Bretainiaraino joan dira, eta gonbidapen ofiziala Christian Troadec alkateari eman diote.
Christian Troadec Karaezko alkatea, gonbidapenarekin. Oiartzuar kuadrilla bat Karaezera joan da, baina ez esku hutsik. Xanistebanetara etortzeko udalaren gonbidapen ofiziala ematera joan dira, euskaraz eta bretoieraz. Christian Troadec alkateak jaso du, eta bera buru, senidetutako herriko ordezkaritza bat hurbilduko da festetara.
Gonbidapena emanda, norbaitek pentsa dezake esku hutsik buelta daitezkeela. Ez da hala izango: Euskal Herriko eta Bretainiako sinboloak batzen dituen eskultura batekin bueltatuko dira. Eskultura hori Arizmendi-eneko lorategian jarriko dute.
Aurtengo xanistebanetan, Karaezek toki nabarmena izango du. Esaterako, abuztuaren 1eko kultura ekitaldian tarte bat eskainiko diote. Gainera, Oiartzun-Karaez batzordeak izango du festen hasiera iragarriko duen txupina botatzeko ardura.
1994an bihurtu ziren ofizial Oiartzun eta Karaezen arteko harremanak.
