[Galeria] Kilometroak gaindituta, festa Artikutzan
San Agustin Eguna dela eta, erromeria ospatzen ari dira Artikutza inguruan. Jendetza asko hurbildu da bertara, usadioa berritzera.
Giro bikaina sortu da lursailean. Artikutza Donostiako Udalak Nafarroan duen esklabea da. Hala ere, oiartzuar asko hurbiltzen dira bertara, San Agustin Egunez egiten den erromeriarekin gozatzera. Inguruko herrietakoak ere hurbiltzen dira: Errenteria-Orereta, Goizueta, Irun, Hondarribia…
Autoarekin joateko egun bakarra izaten da abuztuaren 28a, eta herritarrek aprobetxatu dute Eskasetik Artikutzaraino dauden kilometroak aurrezteko. Han, betikoa aurkitu dute, baina horrek ez du esan nahi txarra denik: meza, pilota partidak, txosnak, artisauen postuak… Gainera, Artikutza zaharraren argazkiekin osatutako erakusketa jarri dute. Ez da askorik aldatu.
Arratsalderako, herri kirolen erakustaldia eta dantzaldia daude programatuta. Horrez gain, ziur faltako ez dena, giro ona izango da. Hona hemen goizean ateratako argazkiak.
