Bi auzipetu espetxera eta beste 45ak aske akordioa adostu ondoren
Bi aldeen artean akordioa adostu dute eta 47 auzipetuetatik 45ek espetxea saihestu dute; beste bik berriz, Arantza Zulueta eta Jon Enparantza espetxeratu egingo dituzte.
Hasi eta bukatu. 11/13 sumarioagatik 10:00etan hasi den epaiketak bide laburra egin du. Bi aldeen artean akordioa adostu dute eta 47 auzipetuetatik 45ek espetxea saihestu dute; beste bik berriz, Arantza Zulueta eta Jon Enparantza espetxeratu egingo dituzte. Aurretik behin behinean egindako espetxealdiak kontuan hartuta, hilabete batzuk egin beharko dituzte kartzelan. Beraz, Onintza Ostolaza oiartzuarra eta Manu Ugartemendia oreretarra etxerako bidean daude. Horiek ziren sumarioaren barruan Oarso Bidasoko bi auzipetuak.
Auzipetu guztiek leporatutako delituak onartu dituzte, eta fiskalak zigor eskaera aldatu egin du. Zuluetarentzat hiru urte eta sei hilabeteko eskaera egin du eta Jon Enparantzarentzat bi urte eta zazpi hilabetekoa; gainontzeko 45 auzipetuei, berriz, urte bat eta sei hilabeteko eta bi urtera arteko zigorra ezarri diete.