Haurtzaroko 31 ikasle eta hiru irakasle Bretainian daude
Bederatzigarren aldiz, Oiartzungo ikastolaren eta Gwiseniko diwanaren arteko elkartrukea egiten ari dira. Astebetez izango dira Bretainian.
Bretainian dauden 31 ikasleak. Haurtzaro Ikastolako DBH4ko 31 ikasle eta hiru irakasle Bretainian daude, datorren larunbatera arte. Bederatzigarren aldiz, ikastola elkartrukea egiten ari da Gwiseniko diwaneko ikasleekin. Elkartrukearen xedeetako bat da ikasleengan frantsesa ikasteko grina sustatzea.
Gwiseni Brestetik 30 kilometrora dago, eta bertako diwanak bretoieraz irakasten du, ingelesa, frantsesa eta latina kenduta. Han ibiliko dira datorren larunbatera arte (hilak 28).
Haurtzaroko ikasleek Bretainiako familien etxeetan hartuko dute aterpe, eta datorren apiriletan, oiartzuarrek bretoiak jasoko dituzte. Gwiseniko 34 ikasle etorriko dira Oiartzunera.
Ohiturak ezagutu
Oiartzuarrek hainbat jardueratan parte hartzeko aukera izango dute, hala nola, itsas-museoaren bisita, oihalgintza; krepe tailerrak; buztingintza; kirol, musika eta dantza tailerrak…
Leire Lekuona frantses ikasgaiko irakasleak azaldu duenez, hizkuntza gutxituekiko kontzientzia eta elkartasuna indartzen ditu: “Gure ama hizkuntzaren antzeko egoera pairatzen du bretoierak. Elkartasun horrek, hizkuntza batek bizirik irauteko beharrezkoak dituen urratsak eta baliabideak zein diren hausnarketa egitera bultzatzen ditu ikasleak”.
Egitaraua
Gaur Gwisseni ezagutuko dute, eta bihar, Gwisseni utzi eta Roscoffera iritsiko dira eta bertan Batz uhartera joateko itsasontzia hartuko dute. Batzen Europako itsasargirik altuenetakoa bisitatu ondoren, Delaselle izeneko lorategi botanikoa bisitatuko dute. Uhartetik bueltan Roscoff ezagutuko dute: bertako antzinako kaleak eta arrain merkatua. Ilunabarrean fest-noz izeneko festa bretoia izango dute Gwiseniko ekitaldi-aretoan: abestiak, Bretainiako musika eta dantzak, eta afaria familiekin, kulturen arteko elkartrukea hain zuzen.
Etzi, egun osoa hango familiekin igaroko dute eta familiek antolatutako programa beteko dute.
Ostegunean, Pleumeur Boudou aldea ezagutuko dute. Han, bela gurdietan ibiliko dira, hondartzan. Hantxe bazkaldu eta ondoren Lesneven herriko museoa bisitatuko dute.
Eta ostiralean, Brest eta haren ingurua ezagutzera joango dira. Han, Oceanopolis aquariuma bisitatuko dute, eta bertan, Bretainiako flora eta fauna ezagutzeko aukera izango dute. Arratsaldean, berriz, funikularra hartu eta Les Capucins auzoa ezagutuko dute. Era berean, Saint Malo kalea bisitatzeko parada izango dute, Bigarren Mundu Gerran suntsitu ez zen kale bakarra.
Azkenik, larunbatean, hilaren 28an, goizeko 09:00etan hartuko dute etxerako bidea, gaueko 21:00etan iristeko Oiartzun aldera.
