Emakume ikusezinak begiratuko ditu 21 aulki zikloak
Hainbat diziplinarekin gozatzeko aukera egongo da hurrengo asteburuan. Horrez gain, emakume sortzaileen lana azaleratuko duen tailerra emango dute.
Oiartzungo Ehuntze espazioa sormenaren habia da, sormena bertatik atera, baina bertara ere eramaten dute. Hori da 21 aulki proiektuaren helburuetako bat. Hirugarren zikloa abiaraziko dute urrian, Emakume ikusezinak begira izenarekin.
Urriko lehen asteburuan hiru saio egingo dituzte; komikigintza antologia baten aurkezpena, poesia errezitaldia eta diziplina anitzeko ikuskizun bana izango dira ekitaldi horiek.
Lehenengo bi saioak Ehuntze espazioan egingo dituzte. Lehena, urriaren 4an izango da. Tupust! komiki antologia feminista aurkeztuko dute Maite Gurrutxagak, Arrate Rodriguezek eta Ainara Azpiazu Axpi ilustratzaileek, Iratxe Retolazak dinamizatutako saioan. 19:00etan hasiko da datorren asteko ostiraleko saio hori.
Urriaren 5erako —larunbata— gorde dute errezitaldia. 18:30etik aurrera, saioaren lehen zatian, Goiatz Labandibar, Aintzane Galardi, Ainara Lasak eta Idurre Eskisabelek beren lanetako pasarteak irakurriko dituzte. Bigarren zatian, Asier Sarasola eta Danele Sarriugarteren txanda izango da. Beraiek, itzuli dituzten egileen testuak errezitatuko dituzte (Alejandra Pizarnik Sarasolak, eta Audre Lorde Sarriugartek).
Zikloaren lehen triptikoarekin bukatzeko, Emakume Burugabea ikuskizuna eskainiko dute udaletxeko areto nagusian, 19:00etan hasita. Antzerki, musika eta literatura emanaldia uztartzen dituzte Antxiñe Mendizabal, Nerea Gartzia eta Pello Ramirezek.
Ikastaroa
Hilabete hasierako emanaldi horiez gain, ikastaro bat eskainiko dute 21 aulki proiektuaren barruan. Iratxe Retolazak Sinesgaitzari bide egiten: Emakume-ahotsen genealogiak ikastaroa emango du urriaren 28an eta azaroaren 25ean. Bi saioak Ehuntze espazioan izango dira, 19:00etan hasita.
Jakinarazi dutenez, tailer horretan euskal kulturako sortzaile batzuen ibilbideak izango dituzte hizpide. Sortzaileen ekarpen artistikoa ezagutu ez ezik, kultur esparruan emakumeek aritzeko eta plazaratzeko izan dituzten aukerez zein mugei buruz ariko dira.
Bi helburu izango dituzte. Alde batetik, euskal kulturako hainbat ekarpen eta testuinguru kultural ezagutzeko aukera izango dute. Bestetik, ekarpen horiei buruzko begirada feminista taxutu nahi dute. Genero ikuspegiak eta genero kokapenek euskal kultura nola gurutzatu duten ikusiko dute.
Izena ematea doakoa izango da, eskainitako tokiak bete arte. Horretarako, 652 70 15 53 telefono zenbakira dei daiteke, edo posta elektroniko bidez idatzi.
Metrokoadroka kolektiboak antolatu du hirugarren ziklo hau, Oiartzungo Udalaren laguntzarekin.