Joanes Larretxeak hamar urte bete ditu espetxean; dinamika iragarri dute
Oiartzungo Sare Herritarrak dinamika bat abiaraziko du, "salbuespenezko legedia" bertan behera utzi eta Larretxearen Euskal Herriratzea eskatzeko.
Joanes Larretxea atxilotu eta espetxean sartu zuenetik hamar urte bete dira gaur, Oiartzungo Sare Herritarrak gogorarazi duenez. Bitarte horretan hiru espetxetan izan da preso: bost urte Fleuryn (Frantzian), Oiartzundik 796 kilometrora; bi hilabete Soto del Realen (Espainia), 425 kilometrora; eta gainontzekoa Herrera de la Manchan, 643 kilometrora.
Sare Herritarrak salatu duenez, hamar urte bete arren, oraindik salbuespenezko legedia pairatzen du Larretxeak. Salbuespenezko legedia definitu dute: “Lehenengo graduan dago, eta bere sorterritik ehunka kilometrotara urrunduta dago”.
Jakinarazi dutenez, presoak behin baino gehiagotan egin du Euskal Herriko espetxe batera hurbiltzeko eskaera, eta behin baino gehiagotan eskatu duela lehen gradutik bigarrenera pasatzea.
“Argi dago”, gaineratu du Sare Herritarrak, “Espainiako espetxe legedia aplikatuz gero, Joanesek baldintza guztiak betetzen dituela bi eskari horiek onar ditzaten. Gainera, egoera horretan dago espainiar espetxeetan dauden preso sozialen %98-a”.
Salatu dute hamar urte hauetan hainbat oztopo eta traba jasan dituztela senide eta lagunek, eta hala nola arintzen saiatu direla: “Hamar urte luze ehundaka kilometro eginez, hamar urte luze errepide istripu bat izateko arriskuan, hamar urte luze milaka euroko zama arintzen, hamar urte luze etxean falta den aitaren hutsunea betetzen, 10 urte luze zauriak ixten…”.
Dinamika
Oiartzungo Sare Herritarrak uste du korapiloak askatzeko momentua dela, eta bidea elkarrekin urratzekoa. “Oraindik irekita dauden zauriak itxi eta elkarbizitzan oinarrituko den bake justu bat elkarrekin eraikitzen hasteko unea da”.
Horregatik, datozen hilabeteetan kalera aterako direla iragarri dute, eskaera argi batekin: “Salbuespenezko legedia bertan behera utz dezatela aldarrikatu eta Joanesen berehalako Euskal Herriratzea galdegingo dugu; urrunketarik ez, salbuespen legediari ez!”.
Oiartzungo eragileekin bilerak egingo dituztela jakinarazi dute, adostasun zabalak lortzeko bidean. “Guztion arten lortuko dugu. Egin dezagun elkarrekin bidea. Elkarbizitza eta bakea”.