Demokraziaren kontrako eraso larria salatu dute
Elkarretaratze zaratatsua egin dute Oiartzunen, zigortuei babesa adierazteko. Erreferendumaren bidean, beldurtu gabe, jarraituko du Gure Eskuk.
Hamarnaka lagun elkartu dira. Mobilizatzera deitu du Gure Eskuk, eta oiartzuar dezentek bat egin du deialdi horrekin. Gaur arratsean oiartzuarren haserrea entzun da. Espainiako Auzitegi Gorena demokraziaren eraso larri bezala definitu du Gure Eskuk. Esan dutenez, bidegabeki zigortu dituzte buruzagi independentistak.
“Epaia ez ezik”, esan du Gure Eskuk, “prozesu judiziala bera ere ez da justua izan; arbitrariotasunez beteta izan da, funtsik gabeko akusazioetan oinarritu da”. Desio zuten epai bakarra absoluzioarena zela berretsi dute, eta epaiak berretsi duela eurek behin eta berriro errepikatu dutena: larrialdi demokratikoa bizi dela.
“Kriminalizatzeari atea”
Gaur ezagutarazi duten epaiak kriminalizatzeari ate bat ireki diola uste du erabakitzeko eskubidearen aldeko kolektiboak. “Manifestazio eskubidea, adierazpen askatasuna, protestarako eskubidea, bozkatzeko eskubidea edota autodeterminazio eskubidea. Kriminalizazio hau erabat onartezina, da. Oinarrizko eskubideak erabiltzea ezin da delitua izan demokrazian. Alderantziz, botere publikoen ardura da haien erabilera bermatzea”, esan dute.
Erreferendumen izaera demokratikoa defendatu dute, eta Euskal Herrian legeztatuta eta erabiltzeko nahia adierazi dute. Ez kapritxoz: “Etorkizuna erreferendum bidez erabakitzearen aldeko herri ekimen bat lantzen ari gara hainbat eragile, erabakiaren bidea ireki nahi dugulako”. Hori lortzeko bidean ez dutela atzera egingo ziurtatu dute.
Gaurko bezalako epaiekin, Altsasuko gazteenarekin edo 155. artikulua ezartzearekin mehatxupean beldurrik nahi dituztela. “Oker daude. Gure etorkizunaren jabe izan nahi dugu, zilegi delako, eskubide demokratiko bat delako. Ez izan zalantzarik, bidea irekiko diogu erabakitzeko eskubideari”.
Larunbatean, Donostiara
Gure Eskuk adierazi duenez, errepresioaren kontra elkartu dira gaur, eta oinarrizko eskubideen alde. Elkarrizketa eta irtenbide politikoa eskatu dituzte, eta mobilizatzen jarraituko dutela iragarri dute.
Datorren larunbaterako jarri dute hurrengo zita. Donostian manifestazioa egingo dute, Antiguotik hasita, auziko presoen alde eta herrien oinarrizko eskubideen alde.
Azkenik, elkartasunik beroena adierazi diete erreferendumaren gaineko epaiketaren ondorioak pairatu dituztenei, baita haien senideei ere. Altsasuko gazteak eta haien ingurukoak ez dituzte ahaztu.
