Auzo batzarren balorazio positiboa egin du Oiartzungo Udalak
Bizilagunen eta udal ordezkarien arteko iritzi trukaketan gehien atera den gaia bizikidetza arauak ez errespetatzearena izan da.
124 herritarrek hartu dute parte auzo batzarretan.
Hilabete hasieran egin zituzten, Oiartzungo Udalak deituta, Oiartzungo auzo batzarrak. Bi aste pasatuta, balorazioa egin du erakundeak, eta positiboa dela jakinarazi du udal gobernu taldeak. Euren esanetan, bertan parte hartu duten herritarrek ere sentsazio horrekin daude.
Auzo batzar horiek ahalduntzeko prozesu direla uste du Oiartzungo udal gobernuak: “Auzoetan komunitatea sortzeko balio dute; iritzi desberdinak trukatzen dira eta herritarrek gaien inguruan duten ikuspuntuaren neurria hartzeko balio izaten dute. Auzoetan jasotzen ditugun ekarpenak oso kontuan hartzen ditu udalak”.
Tokian tokiko kontuez gain, herri osoko gaiak jorratu dituzte, eta datorren urteko aurrekontuaren proposamena aurkeztu die udalak. Udalak esan duenez, gardentasuna eskertu diete auzokideek.
Bizikidetza, kezka
Auzo bakoitzaren berezitasunez gain, gehien errepikatu diren bizikidetzari lotutakoak izan direla jakinarazi dute: bilgailuen abiadura handia; txakurrak solte eramatea eta hauen kakak ez jasotzea; hondakinak gaizki sailkatzea edo ateratzeko ordutegia ez errespetatzea…
Auzo batzarretan parte hartu duten herritarrek udalari eskatu diote neurriak hartzeko eta isunak jartzeko.
Gai orokorrei buruzko iritziak eta ekarpenak ere jaso ditu udalak. Mendiburu 14ko eremuari eta kultur aretoari dagozkionak; etxebizitza politika; bidegorria…
124 lagun
Zortzi auzo batzarretan parte hartu duten oiartzuarrak 124 izan dira. Aurreko urteetako kopuru berdintsua da, eta parte hartzeak gora egin du Altzibar, Ergoien eta Ugaldetxo auzoetan.
Parte hartzaileen adinari dagokionez, gehien-gehienak 30 urtetik gorakoak izan dira (%87,9). Emakume eta gizonen parte hartze maila berbera izan da.
Udal ordezkariek eman dituzte azalpenak.
Udalak azaldu duenez, auzo batzar horietan zuzeneko harremana sortzen da herritarren eta udal ordezkarien artean: iritziak trukatu eta zuzenean informatzeko aukeraz gain, ondoren harremana mantentzen da e-posta bidez, auzoari buruzko informazioa emateko ere bai.
Agintaldiko lehenengo udal batzarren aktak eta erakutsitako informazioa ikusi nahi duenak, udalaren webgunean ditu ikusgai.
Gazteak, azaroaren 18an
Aurrekoetan bezala, gazteekin elkartuko da Oiartzungo Udala. Beraien errealitatea ezagutu nahi du, eta ekarpenak jaso. Auzoetan bezalatsu, proiektuak eta aurrekontu proposamena aurkeztuko diete, labur.
Gazteria Sailaren ekintzen 2019ko ekintzen proposamen zehatza aurkeztu eta 2020an aurrekontuan egin beharrekoa onartzea. Gazteek erabakiko dute zertara bideratu 5.000 euro.
