Oiartzungo bi udal taldeek gorenaren epaia justifikaezina dela adostu dute
EH Bilduk eta EAJk adierazpen instituzionala adostu dute. Biharko elkarretaratzean egongo direla iragarri dute, eta larunbatean Donostiara joateko gonbita luzatu dute.
Oiartzungo zinegotziak, kargu hartze eguneko argazkian. Oiartzungo Udalak adierazpen instituzionala kaleratu du gaur, pasa den astelehenean Espainiako Auzitegi Gorenak jakinarazi zuen epaiaren harira. Udalean ordezkaritza duten EH Bildu eta EAJk adostu dute bost puntuko adierazpena.
Horrela, bi udal taldeek 2017ko urriaren 1eko erreferenduma zilegizko tresna demokratikoa izan zela aldarrikatu dute. “Oiartzungo Udalak ziurtatzen du demokraziaren adierazpen baketsua, indibiduala zein kolektiboa gauzatzea eta herriari hitza ematea ez dela delitua”, zehaztu dute. Esan dutenez, Kataluniak zein Euskal Herriak berezkoa dutela erabakitzeko eskubidea.
Espainiako Auzitegi Gorenak eta estatuko botereek buruzagi independentistei ezarritako zigorrak justifikaezinak direla gaineratu dute.
Justiziaren beraren prestigioan eragina izan duela adierazi dute: “Oiartzungo Udalak nabarmentzen du Kataluniako Proces-aren aurkako auziak eta epaiak Zuzenbide Estatuaren itxuragabetzea dakartela eta ezbaian jartzen dutela espainiar demokraziaren homologazioa nazioartean”.
“Euskal Herriari eragin”
Espainiako Estatuak eman duen erantzun bortitzak —hala definitu dute— euskal herritarrengan eragina baduela ohartarazi dute bi udal taldeek. “Izan ere”, jarraitu dute, “herrien borondatea era demokratiko eta baketsuz erabakitzea mozten du”.
Arazo politikoak elkarrizketaren bitartez konpontzen direla ziurtatu dute, eta estatuak orain arte hartutako erabakiak bidegabeak direla esan dute.
Gainera, eskatu dute Kataluniako preso politikoak aske uztea, eta erbestean daudenen kontrako auzibideak bertan behera uztea.
Bihar elkarretaratzea egingo dute Oiartzungo udaletxearen aurrean, eta ordezkari politikoak bertan egongo direla iragarri dute. Larunbatean Donostiara joateko gonbita ere zabaldu dute.
