Alaia Martin, Gipuzkoako txapelketako finalerdietara
Azpeitiko saioan laugarren izan da bertsolari oiartzuarra. Bost ariketa egin zituzten, eta horietako bitan puntuazio altuena lortu zuen.
Alaia Martin hurrengo fasean egongo da.
Alaia Martin Etxebeste bertsolari oiartzuarra Gipuzkoako Bertsolaritza Txapelketako final laurdenetarako sailkatu da. Atzo jokatu zuten, Azpeitiko Soreasu antzokian, fase horretako laugarren saioa. Sarrera guztiak salduta zeuden, aspalditik.
Bertsolari bakoitzak bost ariketa egin behar izan zituen, hasiera eta bukaerako agurrez gain, eta Martinek lortutako puntuazioa gorabeheratsua izan zen.
Zortziko handian puntu gehien lortu zuen bertsolaria izan zen oiartzuarra —alde handiarekin—, baita kartzelako gaian ere. Zortziko txikian puntuazio pattala eskuratu zuen, sei puntuko motzean hobea eta hamarreko handian saioko irabazleak bakarrik gainditu zuen —Oihana Iguaran Barandiaranek—.
Azkeneko sailkapenean laugarren gelditu zen oiartzuarra. Puntuazioko aldea, baina, nahiko txikia izan zen, lehenengo lauak —Iguaran, Iñigo Mantzizidor, Nerea Elustondo eta Martin— hamar puntuko tartean pilatu baitziren.
Atzoko emaitzarekin, finalerdietarako sailkatuta dago Martin. Saio bakoitzeko lehenengoak —atzokoa laugarrena zen— eta beste hamahiru bertsolari sailkatuko dira. Oiartzuarra seguru da, final laurdenetako saio bakarra geratzen baita, eta kanpoan geratzeko langa oso urruti du (zazpigarren da sailkapen orokorrean).
Lizarralde, Azkoitian
Fase honetako azkeneko saioan arituko da Ander Lizarralde, txapelketan parte hartzen ari den beste oiartzuarra. Azkoitiko Baztartxo antzokian egin beharko ditu lanak, datorren larunbatean, 17:00etan hasita.
Lizarraldek hemezortzi onenen artean egon nahi du. Honako bertsolariekin arituko da: Ane Labaka, Ane Zuazubiskar, Maialen Akizu, Mikel Artola eta Beñat Gaztelumendi egungo txapeldunarekin.
Sailkapenak nola gelditzen diren ikusita, oiartzuarrek etxean joka dezakete finalerdia. Hiru saioetako bat Elorsoro kiroldegian jokatuko dute, azaroaren 24an. Sarrerak esteka honetan klik eginda eros daitezke.
