Gaurik beltzenerako prest daude Abaraxkan
Afari meriendarekin hasiko dute arratsa, eta ondoren ibilbide beldurgarria egingo dute kaskoan zehar, sorpresekin eta suzko akerrarekin.
Datorren ostegunean, beste urte batez, zakuak oinarri izango dituzten mozorroak jantziko dituzte.
Abaraxka ludotekakoek prest dute Gau Beltza. Orain dela urte batzuk berreskuratu zuten ohitura, eta erabat errotuta dago. Pasa den ostegun arratsaldean mozorro, apaingarri eta bestelakoak prestatzen aritu ziren ludotekan.
Datorren ostegun arratsean luzituko dituzte landutakoak. 20:00etan geratuko dira, Kontzejupe plazan, afari merienda egiteko. Ondoren, ibilbide beldurgarriari aurre egin beharko diote, kaskoan zehar. Bertan hainbat sorpresarekin topo egingo dute, eta suzko akerrarekin batera erreko dituzte beren beldurrak.
Errementari filma
Abaraxka ludotekako haur eta gurasoak ez dira Gau Beltzerako planak egin dituzten bakarrak izango. Oihartzun Guk gazte taldeak ere ekitaldia antolatu du.
22:30etik aurrera, Errementari filma eskainiko dute. Gazteak eta ez hain gazteak gonbidatu dituzte Kataxulo gaztetxera.
