Hamalau puntukoa izango da urriko udalbatzarra
Zarata eta dardarei buruzko ordenantza behin betiko onartuko dute, legedi berrira moldatuta. Mendiburu 14 eraikinari dagokion puntu bat ere aztertuko dute.
Hamazazpi zinegotziak plenora deituta daude.
Etzi arratsean, 19:00etan, Oiartzungo udalbatzak plenoa egingo du. Urriari dagokion ohiko plenoa izango da, eta hamalau puntuko gai zerrenda jorratu beharko dute zinegotziek.
Gai nabarmenenak izango direnen artean dago Oiartzungo Zarata eta Dardaretatik Babesteko Udal Ordenantza legedi berrira egokitzea eta onarpena.
Horrez gain, Mendiburu 14 eraikinaren gaineko puntu bat ere izango dute hizpide. Lehenengo eta hirugarren faseetako esleipen proposamenak eramango dituzte mahai gainera.
Taxi zerbitzuaren 2020ko tarifa proposamena ikuskatuko dute, eta herriko bi elkarterekin lankidetza hitzarmena errepasatuko dute. Zehazki, Killirikupe eta Heltarekin dituzten lankidetza hitzarmenak berritzea aztertuko dute.
Plenoaren gai zerrenda osoa ikusteko, esteka honetan egin daiteke klik.
