Lezoko Gau Beltza, ohiturak berreskuratzera dator
Lezoko Gazte Asanblada dago iniziatibaren atzean eta helburu argia du, garai bateko Lezoko ohiturak berreskuratzea.
Gau Beltza egingo dute gaur arratsean Lezon. Argazkia: Gau Beltza Lezok ere ospatuko du Gau Beltza gaur, Domu Santu Egunaren bezperan. Lezoko Gazte Asanblada dago iniziatibaren atzean, eta helburu argia du, garai bateko Lezoko ohiturak berreskuratzea. Halloween gailendu da azken urte luzeetan, eta horren aurrean, milaka kilometrora jo gabe, hemen bertan, Lezon, garai batean baserri giroan Gau Beltza ospatzen zutela ekarri nahi dute gogora, eta ohitura hori berreskuratu.
Aurtengoa lehenengo saiakera da, eta herritarrek erantzungo duten esperantza dute. Horretarako kalabaza tailerra antolatu dute lehenik, 18:00etan, Gurutze Santuaren plazan; parte hartu nahi dutenek Tiñelun dagoen zerrendan eman behar dute izena. Testigantzen tartea helduko da ondoren, Udazken kontuak goiburuarekin, herritarrekin solasaldia antolatu dute. Kalejira beldurgarria antolatu dute ordubete beranduagorako, 20:00etarako alegia. Egitarau sorta amaitzeko, berriz, ekitaldi nagusia egingo dute 21:00etan.
Deialdia egin diete herritarrei parte hartu dezaten, bertara daitezen eta goza dezaten eta hori guztia mozorrotuta egiteko. Mozorroak zaku eta oihal zaharrekin egiteko eskatu diete, gainera, garai batean Euskal Herriko herrietan ospatzen zen eta gaur egun berreskuratzen ari diren hainbat eta hainbatetan egiten duten moduan.
Udalak bat egitera deitu du
Lezok ohitura zaharrak berreskuratzen ari diren herrien zerrendara batu nahi duela esan du udalak, eta Gazte Asanbladaren iniziatiba txalotu du. Lezoar oro eta bereziki haur eta gazteak animatu ditu udalak egun honi beste izaera bat ematera.
Lezon beldurrak piztuko dituzte gaur, eta iluntasuna bizi.
