Urtea bukatu baino lehen hasiko dira Mendiburu 14 eraikitzen
Eraikuntza Artapena SL enpresak eraikiko dute erabilera anitzeko eraikina, plenoak hala esleituta. Bost milioi eta erdi euro pasatxoko kostua izango du.
Kontratazio Mahaiaren erabakia berretsi dute zinegotziek. Oiartzungo Udalbatza atzo bildu zen, urriari dagokion plenoa egiteko. Hamalau puntuko gai zerrenda izan zuten mahai gainean, eta horietan esanguratsuena izan zen Mendiburu kaleko 14 zenbakiko eraikinari dagokiona.
Euskalgintzako eragileen aterpe izango da, baita Gazte Izanak jubilatuen elkartearena ere. Gainera, kultura aretoa joango da bertan. Plenoak —aho batez— atzo esleitu zuen eraikin zaharra eraitsi eta berria eraikitzeko kontratua.
Sei hautagai zeuden, eta Oiartzungo Udalaren Kontratazio Mahaiak ebatzi du Eraikuntza Artapena SL enpresa izango dela esleipena jasoko duena. Plenoaren erabakiari errekurtsorik ez baldin bazaio jartzen, Erakuntza Artapena SL enpresak 25 hilabete izango ditu —asko jota— eraikin berria egiteko.
Obrek 5.536.000 euro pasatxoko kostua izango dute. Jexux Leonet alkateak botazioaren ondoren hartu zuen hitza, eta azaldu zuen udalaren helburua zela obrak 2019 honetan bertan hastea.
Gazte Izanak, lekualdatuta
Euskal Herria plaza izango da Gazte Izanak-en behin-behineko ingurunea.
Atzoko udalbatzarreko erabakiarekin zerikusia (zuzenean ez bada ere) duen lekualdatze bat egon da. Gazte Izanak jubilatuen elkarteak aterpe berria bilatu behar du, Mendiburu 14ko obrek irauten duten bitarte horretarako.
Euskal Herria plazako 8 zenbakiko beheko solairuko lokalean hartuko dute ostatu, behin behinean bada ere. Egoitza berria eraikitzen dietenean, lehenengo solairuan izango dute txoko berria.
Saltoki
Plenora itzulita, zerrendako beste puntu batean Saltoki SL-ren auzia izan zuten hizpide. 2010-2014 epeko zerga ikuskaritzari helegitea jarri zion enpresak, eta auzitegiek onartu. Udalak kasazio-errekurtsoa jarri zion, baina Araba, Bizkai eta Gipuzkoako Auzitegi Gorenak ez du onartu. Beraz, udalak Saltokiren zerga ordainagiri zaharrak deuseztatu eta berriak egin beharko ditu. Zinegotzi guztiek aldeko botoa eman zuten.
Hainbat eragilerekin dituzten hitzarmenak izan zituzten hizpide. Adibidez, Oarsoaldea Garapen Agentziari bigarren eta hirugarren hiruhilekoetan egin beharreko ordainketak onartu zituzten.
Eskualdeko eragilearenaz gain, herriko bi talderekin lotura berritu zuten. Hala, Killirikupe emakumeen taldeak 5.000 euro jasoko ditu, emakumeen ahalduntzean sakontzeko. Helduen Tailerretakoek (Helta) 20.000 euro jasoko dituzte, helduen formakuntzan jarrai dezaten.
Taxi tarifak eta bidegorria
Urtero bezala, Oarsoaldeko taxilarien tarifak egokitu behar dituzte lau udalerrietako Udalbatzek. Eskualdeko tarifak Gipuzkoakoak baino garestiagoak direnez, harmonizazioa bilatuko dute tarifetan, eta ez dira hainbeste igoko.
Bestalde, azkeneko puntuan, Janire Mitxelena EAJko zinegotziak herritarren kexa bat helarazi zuen: bidegorriaren hainbat zatitan ez dagoela argiztapenik. Leonetek esan zion bide egokiena Hirigintza Sailera joatea dela, matxura txiki bat baldin bada segituan konpontzeko, eta zerbait larriagoa balitz, aztertzeko.
