Oiartzungo gazteek 5.000 euro zertara bideratuko duten erabakiko dute
Oiartzungo Udalak batzarra egingo du hilaren 18an, herriko gazteekin. 2020ko aurrekontua azalduko diete, eta haientzako partidan erabakitzeko aukera izango dute.
Auzoetako batzarren ondoren, Oiartzungo Udala herriko gazteekin geratu ohi da. Urteroko zita hori gaur zortzi —hilak 18— izango da, Kataxulo Gaztetxian, 19:00etan.
Udalak jakinarazi duenez, saioa laburra eta dinamikoa izango da. 2020ko udal aurrekontuak azalduko dizkiete modu arin batean. Horrez gain, iazko Gazte Batzarrean herriko gazteek egindako proposamenen harira udalak zehaztu duen eskaintza (lan-munduari begirako formakuntza) aurkeztuko dute. Proposamena begi onez ikusten badute, martxan jarriko dute.
Tailer gisakoak dira udalak planteatuko dituenak, eta gauzatzeko egutegi egokiena ere gazteekin adostu nahi du.
Urtero bezala, udal aurrekontuetan diru partida bat gordeko dute gazteek erabaki dezaten. 2020 urtean 5.000 euro zertara bideratu erabakiko dute datorren astelehenean.