[Galeria] Rocka, paella eta giro ona, Oiartzuarrocken osagaiak
Aurten, hirugarren (+1) aldiz egin dute Oiartzuarrock jaialdia. Herriko taldeekin egun ona pasatu dute. Hori bai, dena gaztetxean egin behar izan dute.
Gaztetxean egin zituzten kontzertu guztiak.
Pasa den larunbatean Oiartzuarrock jaialdiaren hirugarren (+1, Demoarsoren harira antolatutako musika jaialdia kontuan hartzen bada) ekitaldia egin zuten. Jaialdi ibiltaria izan behar zuen hasiera batean, tabernaz taberna ibiliko zena, baina eguraldi petralak Kataxulo Gaztetxean gotortzera behartu zituen. Hala ere, gustura asko egon ziren, herriko taldeen musika entzuten.
Jaialdia irekitzeko ardura izan zutenak Beira taldekoak izan ziren, bertsoa eta musika uztartuz. Ondoren, boluntarioek prestatutako paella jateko txanda etorri zen. Arratsaldean Bi Bemol, Mil Demonios, Txilly, Sindrome Norte eta Txiltxokoren txanda etorri zen. Bukatzeko, Ex-pañolak taldea oholtzara igo zen zortzi urteren ondoren.
Galerian Intza Errandonea, Uxue Flamarique eta Asier Intziartek aterako argazkiak ikus daitezke.
