Errege magoen desfilea helduko da igandean
Tulle kaletik abiatuko da 18:00etan Meltxor, Gaspar, Baltasar eta haien segizioaren desfilea, eta Maria Lezo, Biteri, Alfontso XI, Nafarroa Etorbidea eta Zumardian barrena ibili ondoren, 19:00etan helduko da udalera.
Errege Magoen desfilea Errenteria-Oreretan. Errege magoen desfilea egingo dute igandean Errenteria-Oreretan Telleri IGEa, Egiluze Errenteria IGEa, Jaitoki Furius elkartea, Elipsis elkartea, Udaltzaingoak eta DYAko, Babes Zibileko, nahiz Gurutze Gorriko boluntarioek udalarekin elkarlanean antolatuta.
Tulle kaletik abiatuko da 18:00etan Meltxor, Gaspar, Baltasar eta haien segizioaren desfilea, eta Maria Lezo, Biteri, Alfontso XI, Nafarroa Etorbidea eta Zumardian barrena ibili ondoren, 19:00etan helduko da udalera. Harrera, hala ere, Merkatuzarren egingo dute. Babes zibileko boluntarioak joango dira desfilearen buruan, eta haien atzetik Errenteriako Udal Musika Banda eta jaiotza, baserritarrez jantzitako haurrekin eta musika eskolako trikitilariekin batera. Errege magoen postaria izango da ondoren, eta azkenik, Errege magoen hiru karrozak antortxeroekin. DYAko boluntarioek itxiko dute desfilea, eta guztira 250 bat lagunek osatuko dute.
Desfilean zehar, errege postariak Gurutze Gorriko boluntario batek utzitako eta gidatutako triziklo baten gainean, laguntzaileak izango ditu inguruan eta horiek haurren gutunak jasotzeaz arduratuko dira. Bi aukera izango dituzte, beraz, Errege magoei gutuna idatzi nahi dioten haurrek: laguntzaile horiei desfilean zehar ematea, edota Merkatuzarreko harreran entregatzea. Hiru berritasun jakinarazi dituzte gainera, antolatzaileek: Mindara elkarteak parte hartuko du desfilean estreinakoz; animaliarik ez da izango desfilean, horien eskubideak bermatze aldera; eta jaiotza gidatuko duen izar bat txertatu dute desfilean. Urtero bezala, goxokiak eta txokolatezko txanponak banatuko dituzte, denak zeliakoek jateko egokiak.
Gazteria zinegotziak eskerrak eman dizkie Errege desfilearen antolaketaz arduratzen diren elkarteei, eta herritarrak parte hartzera deitu ditu. Trafikoan eragina izango du desfileak, hemen kontsulta daitezke trafiko eta garraio aldaketa horiek.
