Kopako final erdiak jokatuko dituzte bihar Sanpedrotarrak eta Antxo AFk
Pasaiak bi ordezkari izan ditzake Gipuzkoako Areto Futboleko Kopetan. San Pedroko neskek Astigarragan jolastuko dute final erdia eta antxotarrek etxetik gertuago, Bidebietan.
Sanpedrotarrak onenen artean bukatu du 2019. urtea. Sasoi ezin hobea ari dira burutzen Sanpedrotarra Futbol Elkartearen emakumeen areto futboleko taldea, eta Antxo Areto Futbol Taldea. 25 punturekin areto futboleko 3. mMailako hirugarren postuan dira antxotarrak. Moreek ere onenen artean bukatu zuten 2019. urtea eta azken asteetan emaitza bereziki onak lortu izan dituzte.
Dena dela, ligaz gain bi taldeen zaleek badituzte pozik izateko beste arrazoi batzuk, izan ere, biek jokatuko dituzte bihar Gipuzkoako Kopako finalerdiak. Sanpedrotarrak Astigarragako kiroldegian jokatuko du 19:45etatik aurrera eta Idiazabal izango dute arerio. Biharko norgehiagoka irabaztekotan, hilaren 4ean jokatuko lukete finala, 15:40ean eta berriz ere Astigarragan.
Antxo AFk bigarren aldiz irabazi nahi du Gipuzkoako Kopa.
2017an ezustekoa eman zuen Antxo Areto Futbolak Gipuzkoako Kopako txapeldun bilakatu zenean, eta aurten bide beretik joan nahi dute. Haiek ere bihar jokatuko dute. Etxetik gertu arituko dira, Bidebietako udal kiroldegian, Trintxerpetik metro gutxira. Ibarrako Laubururen aurka jokatuko dute, 19:45ean.
Sanpedrotarrak zein Antxo AFk 2020ari hasiera ona emateko, opari ederra eskaini nahi diete zaleei. Haien babesa funtsezkoa izango da Gipuzkoako Kopako finaletara iristeko. Izan ere, finalerdiak gainditzen badituzte, finalak zain dituzte larunbat arratsaldean, Astigarragako kiroldegian.
