Oiartzabal eta Lachgar Gabonetako Krosaren irabazleak bigarren aldiz
Iazko garaile berberak izan zituen 2019ko Antxoko Gabonetako Krosak. Laugarren urtez jarraian salgai jarritako 250 dortsalak agortu ziren.
Lachgar eta Oiartzabal izan ziren irabazleak bigarren urtez jarraian. 2020. urteari ongi etorria eman baino lehen, ezinbesteko hitzordu bat izan zuten Antxon joana den abenduaren 27an; Pasai Antxoko Gabonetako X. Krosa. Lurdes Oiartzabal lezoarra (24:31) eta Chakib Lachgar errenteriarra (19:06) izan ziren bizkorrenak lasterketan bigarren urtez jarraian, sasoi betean jarraitzen duten seinale. Lasterketa osoan nagusitasunez aritu ziren eta arerioek ezin izan zieten aurre hartu 6,3 kilometroko ibilbidean.
Pozik dira Antxotarrak Lasterkari Taldeko arduradunak, laugarren urtez salgai jarritako 25o dortsalak agortu zirelako. Probaren arrakastak ez du etenik eta dagoeneko Gabonen ekintza klasiko bihurtu da Antxon. Lasterkariez gain, zaleek ere ez zuten hutsik egin, ehunka lagunek topo egin zuten Antxoko kaleetan korrikalariei babesa emateko. Denei esker, jai giro paregabea izan zen barrutian.
Emakumeetan, Oiartzabalen atzetik Zabaleta leitzarrak eta Edurne Irureta errenteriarrak osatu zuten podiuma. Gizonetan, Raul Gomez Margallo lasartearra izan zen bigarren sailkatua eta Iñaki Peña donostiarra hirugarrena. Beteranoei dagokienez, Berastegiko Arantxa Atxukarro eta Irungo Victor Madejon izan ziren azkarrenak. Edurne Jauregi eta Gorka Simon antxotarrek bestalde, pasaitar onenen sariak jaso zituzten.
Pasai Antxoko Gabonetako X. Krosan parte hartu eta antolakuntzan lagundu duten eragile guztiei eskerrak eman dizkie Antxotarrak Lasterkari Taldeak; Pasaiako Udalari, Udaltzaingoari, Babes Zibileko kideei, Antxoko Jai Batzordeari, laguntzaile zein babesleei eta antxotar boluntarioei.
HITZAk galeria txikia osotu du, probako hainbat irudirekin.
