Viktoria Eugenia antzokian hasiko du denboraldia gaur musika bandak
Donostiako Viktoria Eugenia antzokian izango da Golden Apple Quartet taldearekin batera Golden Apple Xey ikuskizunarekin. Txiki utziko dute antzokia, hori jakina da dagoeneko, sarrera guztiak agortu baitira. Emanaldia, gainera, EITB-k grabatuko du.
Musika Banda Madalen Eguneko kontzertuan. Denboraldi berriari ekingo dio gaur EMKEren Musika Bandak eta ez du edonolako agertokia aukeratu, izan ere, Donostiako Viktoria Eugenia antzokian izango da Golden Apple Quartet taldearekin batera Golden Apple Xey ikuskizunarekin. Txiki utziko dute antzokia, hori jakina da dagoeneko, sarrera guztiak agortu baitira. Emanaldia, gainera, EITB-k grabatuko du.
EMKE Errenteriako Musika Kultur Elkarteko iturriek adierazi dutenez, herriko musika bandaren ibilbide luzean —156 urte baino gehiago— inflexio puntua izango da honako denboraldi hau, etorkizunari begira jarriko baitu “proposamen berriak egokitu eta antolatzeko prozesuan sakonduz”. Gaurko emanaldia 20:00etan hasiko da, eta sarrerarik gabe gelditu direnak, behintzat, EITBren bidez ikusteko aukera izango dute.
Hurrengo hitzordua, berriz, hilaren 6an, astelehen, izango du EMKE Musika Bandak Foru Plazan 12:30ean emango duen urte berriko kontzertuarekin. Eguraldiak laguntzen ez badu, Koldo Mitxelena ikastetxeko jolastoki estalira eramango dute kontzertua. ketelbey, Von Suppe eta Johan Straussen doinuekin osatuko du kontzertua.
Iaz denboraldi arrakastatsua izan zuela nabarmendu du musika bandak: “9.800 entzule baino gehiago bildu dira gure kontzertuetara”.
