Etxerat-ek antolatutako bertso saioak Elorsoro elkartasunez beteko du
Oraindik geratzen dira sarrerak etziko saiorako, bihar arte. Punta puntako zortzi bertsolari igoko dira Elorsoro kiroldegiko oholtzara, tartean Jon Martin oiartzuarra.
Zortzi bertsolari igoko dira oholtzara.
Etxerat-ek urtero antolatzen duen bertso saioa etzi izango da, Elorsoro kiroldegian. Antolatzaileek jakinarazi dutenez, oraindik geratzen dira sarrerak, eta bihar arte eros daitezke.
Oiartzunen Kastro Berri eta Miren tabernetan eros daitezke txartelak, baita Elorsoro kiroldegian ere. Oiartzundik kanpo, berriz, beste tokiotan: Landare eta Arkaitza tabernetan (Errenteria-Orereta); Lezoko Tiñelu elkartean; Irungo Kabigorri tabernan; Donostiako Platero eta Herria tabernetan zein Hontza liburudendan; Lesakako Arrano elkartean; Hendaiako Xaia ostatuan; Hernaniko Garinen; Lasarte-Oriako Jalgi tabernan eta Villabonako Iratzar tabernan. Gaur eta bihar 12 euroko prezioa izango dute; igandean, 15 eurokoa.
Sarrerarik erosi behar ez duena Elixabete Pescador Uralde izango da. Izan ere, Hitzak harpidedunen artean egindako zozketako garailea izan da, eta bi sarrera eskuratuko ditu.
Punta-puntako bertsolariak
Urtero bezala, presoen senideekin elkartasuna nagusituko da Elorsoro kiroldegian. Eta, urtero bezala, punta-puntako bertsolariak gonbidatu dituzte. Amaia Agirre gai jartzaileak honako bertsolariei jarriko dizkie ariketak: Miren Amuriza, Andoni Egaña, Onintza Enbeita, Beñat Gaztelumendi, Agin Laburu, Maialen Lujanbio, Jon Martin eta Julio Soto.
Bertso saioa 17:00etan hasiko da.
