Jostailu bilketarekin pozik daude PSE-EEko ordezkariak
Zortzigarren urtez jarraian, PSE-EEko Errenteriako taldeak eta Gipuzkoako JSE-Egazek jostailu bilketa egin dute. Gurutze Gorriak banatuko ditu.
Iñaki Rodriguez eta Jose Angel Rodriguez PSE-EEko kideak, jostailuekin.
Errenteriako Elkarte Sozialistak eta Gipuzkoako JSE-Egazek Gabonetako jostailu bilketa egin dute, zortzigarren aldiz. Irribarre bat oparitu ezazu lelopean jaso dituzte jostailuak, eta Gurutze Gorriaren bitartez banatuko dituzte, behar handiena duten familien artean.
Pozik daude bukatu berri den kanpainarekin. Parte hartu duten herritar eta afiliatu guztiei eskerrak eman dizkiete, bi eragileri bereziki: Oiartzungo Alcampo eta Gabierrotako Laguntasuna jubilatuen elkarteari.
Herriko Etxean egin zuten jostailuen entrega ekitaldia. Talde sozialistetako kideez gain, Gurutze Gorrikoak ere han izan ziren.
“Interesa eskertzen dugu”
Jose Angel Rodriguez Errenteriako PSE-EEko idazkari nagusiaren esan duenez, bilketaren emaitzek asebete dituzte: “Eskertzekoa kanpaina berri honengatik egon den interesa. Nabarmentzekoa da jaso dugun opari kopurua, baita haien aniztasuna ere”.
Kanpainaren helburua herritarren arteko elkartasuna sustatzea dela esan du Rodriguezek, eta oparirik egin ezin dezaketen familietara ilusioa eramatea. “Orain, opari hauekin, badute opariak egiteko aukera”, gaineratu du.
Iragarri dutenez, kanpaina solidarioak egiten jarraituko dute hasi berri den urte hobetan, eskola materiala jasotzearena kasu.
