Meipik jai propioak izango ditu 2020an
Auzokide talde bat lanean hasi da, Meipi auzoak bere jaiak ospatu ditzan lehen aldiz. Maiatzaren 15etik 17ra ospatuko dituzte jaiak.
Meipiko Jai Batzordeko kideak astero biltzen dira proiektuari forma emateko. Meipiko biztanleek denbora daramate lanean auzo sena sendotzearren. Helburu horri jarraiki berritasun handi bat dakarte Meipiko kuadrillek urte berriarekin batera; auzoak jai herrikoiak ospatuko ditu lehen aldiz 2020an. Berria orain helarazi duten arren, aurre lanketa baten ondorio da, izan ere, kuadrilla ezberdinetako hainbat kide astero bildu dira urriaz geroztik, proiektuari formar emateko.
Jai herrikoiak izango dira, eta hain zuzen ere herritarrek erabakiko dituzte programako edukiak. Hala ere, dagoeneko iragarri dute, haurrentzako ekintzak, rock kontzertua, berbena, danborrada edota bazkari herrikoiak ez direla faltako.
Erronka nagusia, aurrekontuan izango dute. Herritik eta herriarentzat jaiotako jaiak izango dira. Tamalez, herriak ez ditu sosak soberan, hortaz, hainbat jardueren bidez lortu beharko dituzte baliabide ekonomiko eta materialak. Jaiak ospatu aurreko hilabeteetan zozketak eta tankera bereko ekintzak antolatuko dituzte dirua biltzeko.
