Kulturako diru-laguntzen banaketa hobetzeko proposamena egingo du EH Bilduk
15.000 izan beharrean, banatu gabe gelditu direnak 12.400 euro direla onartu dute. Dena dela, kopuru hori altxortegian gelditzea, gehiegizkoa izaten jarraitzen duela nabarmendu dute.
Diru-laguntza banatzeko bestelako eredua landuko du EH Bilduk Kultur arloan ematen diren diru-laguntzen banaketa eredua hobetzeko lanean hasiko direla jakinarazi du Pasaiako EH Bilduk. Hautsak harrotu ditu diru-laguntzen kudeaketak. Koalizioak prentsa ohar baten bidez, onartu du 15.000 euro ez, 12.400 euro direla banatu gabe gelditu direnak, partidan aurreikusita zegoenaren %35,43a alegia. Hala ere, halako kopurua banatu gabe gelditzea, gehiegizkoa izaten jarraitzen duela nabarmendu dute, “diru eskaera nahikoa ez dagoelako sobratzen dela esatea elkarteekin errespetu falta ikaragarria da”.
Soberanisten iritziz, elkarteak eta bertan parte hartzen duten herritarrak dira Pasaiari benetako herri sena emateaz arduratzen direnak, “boluntario gisa lanean ari diren guztiekiko errespetu falta handia da diru hori altxortegira kondenatzea” adierazi du EH Bilduk. Hori dela eta, banaketa kudeatzeko bestelako eredua nahi dute.
Pasaiako Udaleko Kultura Zinegotzi Jorge Aguayok kudeaketaren inguruko kexei “entzungor” egin diela diote, izan ere, haiek bezala, udal teknikariek hainbatetan salatu dute diru-laguntzak banatzeko kudeaketa eredua dela arazoa. Gainera, EH Bilduk egindako eskariei muzin egin diela azaldu dute, “ez dago irizpideen inguruko birplanteamendurik, ezta soberan gelditu den diruarentzako planteamendurik ere ez”.
PSE eta EAJk osatutako udal gobernuak “irtenbide adostu bat” eman nahi ez diolakoan, bide propioa egingo du koalizioak ” EH Bildu, Pasaiako lehen indar politiko gisa, lanean jarriko da diru-laguntza eredu berri bat elkarteekin batera landu eta gainontzeko taldeei proposatzeko”.
