Batelak asteburuan hasiko dira lehian, Donostian
Gipuzkoako Batel Ligako lehen estropada Urumea ibaian egingo dute. Bigarrena Pasaian da, otsailaren 2an.
Ligako bigarrena otsailaren 2an da, Pasaian. Gipuzkoako Batel Ligako lehen estropada asteburuan egingo dute Donostian. Bihar da hamalau jardunaldi izango dituen lehiaren estreinakoa: 15:30ean hasiko dira maila ezberdinetako arraunlariak urteko lehen arraunkada ofizialak ematen, Urumea ibaian, Loiola auzoaren parean. Erlojupekoa izango da, banan-banan egingo dute bidea batelek.
Partaideen artean Oarsoaldeko lau klubetako ordezkariak izango dira, San Juan-Koxtapekoak, San Pedrokoak, Trintxerpe-Illunbekoak eta Hibaikakoak. Azken urteetan oso emaitza onak lortu dituzte kategoria guztietan bertako batelek, beraz, aurten ere garaipenen bila joango dira arraunlariak.
Gipuzkoako Batelen Ligako bigarren estropada otsailaren 2an egingo dute, Pasaian, Trintxerpe-Illunbek antolatua. Horren atzetik beste hamabi jardunalditan arraun egingo dute kategoria guztietako kirolariek. Ligako azken estropada martxoaren 29an da, eta horren ondorengo asteburuan, apirilaren 4 eta 5ekoan, Gipuzkoako Txapelketaren txanda izango da. Donibanen izango da bi jardunaldiko lehia hori.
Trainerillen Gipuzkoako Txapelketa apirilaren 25ean hasiko da, Mutrikun. Zazpi jardunaldiko ligaxka da.
Tosta mugikorra
Tosta finkoko lehia ofizialak asteburu honetan hasiko badira ere, mugikorrekoek jada badute bidea egina. Hala, abenduaren 22an eta hilaren 5ean Orion egin zituzten Aulki Mugikorreko Gipuzkoako Ligako lehen bi jardunaldiak. Hurrengo proba Orion dute ere bai, hilaren 19an: Gipuzkoako Txapelketa izango da jokoan. Urtarrilaren 25ean jokatuko dituzte aulki mugikorreko ontziek Euskadiko Txapelketak.
