Kirol materiala bidali du Lesbosera Pasaia Kirol Elkarteak
Hitzarmen solidarioa lotu dute Pasaiak eta Zaporeak elkarteak. Futbol kamisetak, zirak eta neguko arropak bidaliko dituzte Egeo itsasoan kokatzen den uhartera.
Ezkerretik hasita; Blanco, Jalon eta Eskisabel, Lesbosera bidalitako materialarekin batera. Milaka kilometro banatzen dituzten arren, atzo baino hurbilago daude Pasaiako Badia eta Egeo itsasoa. Pasaia Kirol Elkartea kirol materiala bidaliko du Greziako Lesbos uhartera, errefuxiatuen artean banatzeko. Ekintza solidarioa, Pasaia K.E. eta Zaporeak elkartearen lankidetzaren ondorio izan da. Gastronomia eta elkartasuna batzen ditu Zaporeak elkarteak. 2016. urtetik Lesbosen lanean ari dira elkarteko boluntarioak, bertan dauden milaka errefuxiatuei janaria kozinatzen eta banatzen.
2011. urtean Siriako gerra hasi zenetik, errefuxiatuak —siriarrak zein beste tokietakoak— itsasoko beste aldetik iristen hasi ziren Lesbosera. Egoerak 2015an egin zuen eztanda; milaka errefuxiatu iritsi baitziren Lesbos eta inguruko uharteetara. Europar Batasunak eta Turkiak, migrazioa eteteko hitzarmena lotu zutenetik, egoerak okerrera baino ez du egin, errefuxiatuek ezin baitute haien bidea jarraitu eta ondorioz errefuxiatu guneetan geldirik daude, baliabiderik gabe eta lan egiteko aukerarik gabe. Testuinguru hartan, kanpotik jasotako elkartasunak ikaragarrizko garrantzia du.
Bada, elkartasun kate horren parte izango da Pasaia Kirol Elkarteak; Zirak, futbol kamisetak eta neguko arropa bidaliko dituzte Lesbosera Zaporeaken bidez. Haiek material guztia Team Humanity erakundeari emango diote, eta erakundeak egingo du banaketa errefuxiatuen artean. Atzo Jesus Mari Zamora futbol zelaian egindako agerraldian, Gorka Blanco Pasaia Kirol Elkarteko presidenteak eta eta Jokin Koki Eskisabel kirol zuzendariak esker ona adierazi zioten Jesus Jalon Zaporeak elkarteko lehendakariari, Lesbosen egindako elkartasun lanarengatik.
