Lurdes Oiartzabal eta Hodei Lujanbio, lehenak Mitxintxolan
Inoizko parte hartzaile gehien jaso zituen Itsas Mendiren lasterketak atzo, 121 partaiderekin. Oinezkoen martxan beste 100 kide izan ziren.
Inoizko partaidetza handiena izan du aurten mendiko lasterketak. Errekorrez betetako Mitxintxolako Igoera egin zuten atzo, Donibaneko Itsas Mendi Kultur eta Kirol Elkarteak antolatuta. Lasterketan inoizko partaide kopururik handiena izan zen, 121. Oinezkoen martxan, beste 100 partaide. Eta irabazleen denboretan ere, errekorra: Hodei Lujanbio Oiartzungo Intxixu Trail Taldeko goizuetarrak gizonen marka onena hautsi zuen, 17:22ko denbora eginez. Emakumeetan, berriz, Lurdes Oiartzabal Camp Base taldeko kide lezoarra irabazle, 21:15 denborarekin. Motza da lasterketa, 3,4 kilometrokoa, baina eskaera handikoa partaideentzat.
Haurren mailako lasterketa ere izan zen. Bertan, etxekoak onenak: Nora Gametxo (28:23) eta Mikel Aramendi (19:23).
Sailkapen osoa ikusteko, klikatu jarraian dagoen estekan: Mitxintxolako Igoera 2020, sailkapen osoa (PDF artxiboa).
Lasterketaren ondoren, giro ezin hobean sari banaketa ekitaldia egin zuten Arrokaundieta inguruko Piraten Etxean. Goxo izan ziren partaideak, eta nola ez, irabazleak. Salda beroa eta txorixo egosia ez ziren falta izan, baita lehenengoz, dutxa beroa hartzeko aukera ere.
Itsas Mendikoak pozik atzoko lasterketak (Oarso Bidasoko urteko lehen mendiko lasterketa) emandakoarekin: “Urtez urte indarra hartzen ari den lasterketa motz honek pozez betetzen gaitu Itsas Mendiko mendiko taldeari”.
Jarraian, atzoko hainbat argazki.
-
- Hodei Lujanbio, gizonetan irabazle.
-
- Lurdes Oiartzabal, emakumeetan irabazle.
-
- Mikel Aramendi, haur mutiletan irabazle.
-
- Nora Gametxo, haur nesketan irabazle.
-
- Sari banaketa ekitaldia Piraten Etxean.
-
- Irteera, Donibaneko plazan.
