Mendiburu 14 eraikitzeko lanak hasi dira
Gaur hasi dira eraikina eraisteko prestaketak, eta ekainerako lurrera botata egongo dela iragarri du udalak. Trafikoan eragina izango du.
Gaur hasi dira eremua prestatzen. Mendiburu 14 erabilera anitzeko eraikina izango dena eraikitzeko obrak hasi dituzte gaur goizean. Egungo eraikina lurrera botatzeko prestaketekin hasi dira gaur.
Eraikuntza Artapena enpresak egingo ditu lanak, eta 5.536.337,80 euroko aurrekontua izango dute. Lanak bukatzeko bi urte pasatxo izango dute —25 hilabete, zehazki—.
Prestaketa eta eraikitzeko lanek ekainera arte iraungo dute jakinarazi dute.
Eragina inguruan
Lanek eragina izango dute inguruan. Adibidez, Yon Oñatibia eta Mendiburu kaleen arteko lotura itxita egongo da eraisketa lanek irauten duten bitartean.
Ibilgailuentzako ez ezik, oinezkoentzako aldaketak ere izango dira. Horrela, Landetxe plaza eta Mendiburu kalea lotzen dituen eskailera itxita egongo da lanek irauten duten bitartean.
Posta bulegoaren ohituretan ere aldaketa txiki bat egongo da. Deskargak Iparralde etorbidetik egingo dituzte. Horretarako, aparkaleku bat erreserbatuko diete, bulegoaren lan orduetan.
Eragin handiena, baina, Mendiburu kalean eta Landetxe plazan bizi diren auzotarrak jasango dute, soinua, hautsa eta obrek sortzen duten beste hainbat eragozpenengatik. Hori dela eta, Oiartzungo Udalak bilera egin zuen auzotarrekin. Lanen garapenari buruzko lehen eskuko informazioa eman zieten, haien zalantzak jaso eta argitu zituzten.
