Omenaldia eskaini diote Karlos Saldiseri haren hilketaren 40. urteurrenean
Hamarnaka herritarrek bat egin dute haren omenezko ekitaldian, Saldise oroitu, justizia eskatu, eta senideei sostengua adierazteko.
Karlos Saldiseren hilketaren 40. urteurrenaren omenaldian 'Agurra' dantzatu diete senideei. Joaldunek zabaldu dute Karlos Saldiseren omenezko ekitaldia haren hilketaren 40. urteurrenean. Oroimena, justizia eta elkartasuna nagusitu dira bildutako dozenaka herritarren artean. Omenaldi hunkigarria izan da gaurkoa, lagun eta senideen oso gertukoa, Lezon egokitutako sanjuandarra gogoratzeko antolatutakoa.
Agurra eta lore eskaintza egin dute hainbat lezoarrek ekitaldiaren hasieran, zenbaitzuk Saldiseren familiari eskainita, beste batzuk haren omenezko oroitarriari begira. Senideak oso kontuan izan dituzte ekitaldi osoan zehar, baita haientzako oroigarriak banatu ere.
Ainhoa Salaberria lezoarra aritu da aurkezpen lanetan, eta argi mintzatu da gertatutakoaren inguruan: «Garai nahasi eta gogorrak bizi zituen Euskal Herriak 1980ko hamarkadan: klandestinitatea, zentsura, borroka armatua, talde parapolizialak, sarekadak.. Testuinguru horretan herriarekiko eta herri mugimenduarekiko konpromiso handia azaldu zuen [Saldisek], eta konpromiso hori izan zen hain zuzen ere, hura akabatzeko arrazoia».
Ildo horretan, Saldisek esparru ezberdinetan egindako ekarpenak hizpide izan ditu Salaberriak, eta horien guztien artean nabarmendu ditu gazte mugimendua, mugimendu feminista, amnistiaren aldeko gestorak, euskara eta euskal kultura, presoen dispertsioa pairatzen zuten senideak, eta askatasunaren alde lan egiteagatik klandestinitatean bizitzera derrigortuak zeudenak.
Egiari Zor fundazioko Ane Muguruza ordezkariak ere hitza hartu du ekitaldian. «Euskaltzalea eta ezkerreko militante abertzale konprometitua izan zen Karlos Saldise, horregatik hil zuen tiroz bere etxeko atarian estatu terrorismoak», adierazi du. «Estatu terrorismoaren biktimei» eta «haien senideei» aitortza egiteko baliatu nahi izan du ordezkariak ekitaldia. Ondoko bideoan ikus daiteke diskurtsoa osotasunean.
Orotariko hitzak entzun dira gaurko ekitaldian, eta gehienbat Saldiseri zuzenduak egon arren, beste herrikide bat omendu nahi izan dute. Ekitaldi guztietan presente egon izana goraipatuta, Estanis Karrera musikagileak ere oroigarri bat jaso du gaurkoan.
Etenik ez
Ordubete inguru iraun du Saldiseren omenezko ekitaldiak, eta aipatutako guztiaren ondoren, Iñaki Egaña historialaren ikerketen inguruko ikus-entzunezkoa eta Saldiseren arreba Karmelek eskainitako elkarrizketa ere proiektatu dituzte. Era berean, Iñaki Labaka musikariak bi kanta eskaini dizkio Saldiseri, tartean, Mikel Laboaren Martxa baten lehen notak ondoko bideoan ikus daitekeenez.
Azkenik, Ainhoa Intxaurrandieta ezker abertzaleko ordezkariak hartu du hitza. Garaiko aitzindari eta lidertzat jo du Saldise, «hitzez eta ekintzez», gaineratu du. Sanjuandarrak aurrera eramandako eskubideen aldeko borroka goraipatu du abertzaleak, eta nazio askatasunerantz aurrera egindako urratsak izan ditu hizpide. Eusko Gudariak kantaren ondoren, herri bazkarian biltzekoak ziren berriz ere lezoarrak.
