Oiartzunera etorri berriek AISA ikastaroan eman dezakete izena
Oiartzunera etorri diren hamasei urtetik gorakoei zuzenduta dago, eta euskarara eta euskal kulturara hurbilaraztea da helburua.
AISA ikastaroan izena emateko epea zabalik dago. 2019/2020 ikasturtean eskainiko den bigarren aldia izango da. Oiartzunera etorri berri direnei euskara eta euskal mundura hurbilpen bat egiteko antolatzen da AISA ikastaroa. Izena emateko epea zabalik dago, eta otsailaren 7ra arte eman ahalko dute izena.
Intxixu AEK euskaltegiko irakasleek emango dituzte eskolak, otsailaren 17tik ekainaren 12ra. Eskolak emateko egun eta tokia ikasleekin eurekin adostuko dute. 60 orduko ikastaroa izango da eta matrikulak sei euroko kostua izango du
Oiartzungo Udalak diru laguntza eskainiko du, nahi izanez gero. Ikasleek asistentzia kopurua betetzen badute, ikastaroaren bukaeran bertaratu izanaren ziurtagiria jasoko dute.
Izena eman nahi dutenek Fermiñene etxetik pasa beharko dute, Euskara Sailaren bulegora edo Intxixu AEKra. E-posta bidez ere eman daiteke izena, edo telefono bidez, Euskara Sailera (943 49 38 42) edo Intxixu AEK euskaltegira (943 49 39 57) deituta.
